Փաստ ինֆո

«Որպես հայ, որպես Երևանի բնակիչ չեմ կարող հասկանալ այսօրվա իշխանության քայլերը, ինձ համար դրանք անհասկանալի ու անընդունելի են»,-այս մասին այսօր լրագրողների հետ ճեպազրույցում ասաց դերասան Վիգեն Ստեփանյանը։

Հիշեցնենք, որ այսօր Կառավարության դիմաց ԿԳՄՍ նախարար Արայիկ Հարությունյանի պահանջով բողոքի ակցիա էին իրականացնում ՀՅԴ երիտասարդներն ու ԵՊՀ ուսանողները։ Նրանց ակցիային էր միացել նաև դերասան Վիգեն Ստեփանյանը։

Ըստ նրա՝ ամենամեծ խնդիրն այն է, որ եթե Արայիկ Հարությունյանը գնա, ապա ո՞վ կստանձնի նրա փոխարեն այդ պաշտոնը. «Կարծում եմ, որ կադրեր ունենք, բայց հազարավոր պիտակ կդնեն ու կբերեն «իմ մարդու» սկզբունքով. իմ մարդը, իմ նշանակածը պետք է լինի ու վերջ։ Ի՞նչ է այսօր մեր խորհրդարանը, «Իմ քայլը» կստանա այն, ինչ որոշել է, որովհետև ոչ մի այլ դեմ չի ստացվի, ինչքան էլ միանան ընդդիմադիրները»։

Ստեփանյանը կարծում է, որ ժողովուրդը հիասթափված է և եթե հանկարծ արտահերթ ընտրություններ լինեն իշխանությունը 25-30 տոկոս ձայներ կստանա։
«Փաստինֆո»-ի հարցին, թե արդյոք նա եւս պահանջում է Արայիկ Հարությունյանի հրաժարականը՝ դերասանը պատասխանեց. «Ես չեմ հավատում, որ Արայիկ Հարությունյանի գնալով ինչ-որ բան կփոխվի։ Գնաց Մակունցը, եկավ Նազենի Ղարիբյանը, ի՞նչ փոխվեց, ինչ էլ փոխվեց գնաց դեպի վատը, հիմա պաշտոնը ստանձնել է Արաքս Մալյանը, ինչո՞վ է զբաղվելու, հին թերացումները շտկելո՞վ, թե՞ նոր քայլեր անելով»։

Անդրադառնալով «ՀուԶանգ ու Զանգ» ներկայացմանն ու «Մել» ֆիլմին՝ դերասանն ասաց. «Մետրոյի առաջ, իբր, ներկայացում են խաղում ու լուրջ գումար է տրամադրվում։ Այդ գումարով երկու ներկայացում կարող էին բեմադրել, ասենք մանկական որևէ թատրոնում։ Ֆիլմ են ուզում նկարել սեռափոխված ծանրամարտիկի մասին, ընդ որում, երբ լսեցի՝ ֆինանսավորվել է միայն նրա չեմպիոն լինելու հատվածը չգիտեի ծիծաղեի, թե ոչ։ Այսինքն` առանձին-առանձի՞ն ենք նայելու, համասեռամոլները գնալու են առանձին դահլիճում նայեն այն, ինչ իրենց է հետաքրքրում, սպորտի սիրահարներն էլ առանձին դահլիճու՞մ։ Սա այնքան անտեղյակ մարդու կարծիք է, որ չգիտես ոնց վերաբերվես ծիծաղես, տխրես, թե ինչ անես»։

Մանրամասները՝ տեսանյութում։

Աղբյուր` Փաստինֆո