Փաստ ինֆո

ՊՊԾ գնդի գրավման պատճառի մասին հարցնելու ժամանակը ոչ թե հիմա է, այլ՝ ապստամբության առաջին վայրկյաններն։ Այս մասին «Սասնա Ծռեր-1» գործով դատական նիստին հայտարարել է սույն գործով մեղադրյալ Գագիկ Եղիազարյանը։

Վերջինս նշեց, որ, եթե գոյություն ունենար իրավապահ համակարգ, ապա ձերբակալման պահին իր և Արամ Հակոբյանի նկատմամբ բռնություն գործադրելու դեպքի առթիվ գործ կհարուցվեր։

Պատասխանելով մեղադրող դատախազ Պետրոս Պետրոսյանի հարցին, Եղիազարյանը նշեց, որ սպանված գնդապետ Վանոյանն ինքն է առաջինը կրակ բացել և վիրավորել Սմբատ Բարսեղյանին, որից հետո ինքնապաշտպանության համար պատասխան կրակ են արձակել։

Հարցին, թե արդյո՞ք ինքը զինված եղել է, Եղիազարյանը դրական պատասխանեց՝ չցանկանալով մանրամասնել զինատեսակի մասին։

Անդրադառնալով Գագիկ Մկրտչյանի հրազենային վիրավորմանը՝ վերջինս նշեց, որ վիրավորում ստանալու հանգամանքներին ծանոթ չէ և տեսել է նրան հսկիչ անցագրային կետի հարևանությամբ՝ ձեռքը փաթաթած։

«Խնդրում էր, որ իրեն թողնենք գնա։ Ես հարցրեցի՝ այլ խնդիր ունե՞ս բացի թևից, ի՞նչ ես կարծում չարժե՞ Շտապ օգնություն կանչել, ասաց՝ ոչ, ես կարող եմ ինքս գնալ։ Ասեցի՝ շատ լավ։ Մենք ընկերներով կզրուցենք և այդ ամենի վերաբերյալ կարծիք կհայտնենք։ Քիչ հետո ես իմացա, որ նա արդեն գնացել է»,- ասաց Եղիազարյանը։

Նախագահող դատավոր Մեսրոպ Մակյանի հարցին, թե արդյո՞ք Գագիկ Մկրտչյանի մահվան հանգամանքների վերաբերյալ իր ընկերներից որևէ բան իմացել է, թե ոչ՝ կապված Պավել Մանուկյանի հայտարարած նոր հանգամանքների մասին, մեղադրյալ Եղիազարյանը նշեց, որ փաստացի տեսել է, որ Մկրտչյանը վիրավոր է ձեռքից և կալանավայրում հեռուստատեսությամբ է իմացել, որ, վերջինս գիտակցության չգալով, մահացել է։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։

Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։

Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։

ՊՊԾ գունդը զավթելու եւ նշված այլ արարաքները կատարելու մեջ ընդհանուր առմամբ մեղադրվում է 32 անձ: Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատմարտիկ Արայիկ Խանդոյանը, ով հայտնի է որպես «Միայնակ Գայլ» մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։
Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Հեղինակ՝ Իզաբել Սահակյան

Աղբյուր` Փաստինֆո