Փաստ ինֆո

Ազգային ժողովում հերթական նիստը սկսվեց փոքր-ինչ լարված մթնոլորտում։ ԱԺ կանոնակարգ սահմանադրական օրենքում լրացում կատարելու մասին և անվտանգության խորհրդի կազմավորման և գործունեության մասին օրենքում փոփոխություն և լրացում կատարելու մասին օրենքի նախագծերի փաթեթի քվեարկության ժամանակ «Լուսավոր Հայաստան» խմբակցության պատգամավոր Տարոն Սիմոնյանը նշեց, որ առաջարկությամբ էին հանդես եկել, որը չի ընդունվել, հետևաբար իրենք դեմ կքվեարկեն. «Մեր կարծիքով պառլամենտական երկրներում կարևոր է, որ քաղաքական խմբակցության առաջնորդները ևս մասնակցություն ունենա անվտանգության խորհրդում, որպեսզի ԱԺ-ն ամբողջական ներկայացված լինի և ներկայացված փաթեթով մեր կարծիքով ամբողջությամբ լուծում չի առաջարկվում։Մեր առաջարկությունը մերժել էին և մենք դեմ կքվեարկենք» ,-ասաց Տարոն Սիմոնյանը։

Նախագծի հեղինակ «Իմ քայլը» խմբակցության պատգամավոր Աննա Կարապետյանն էլ նկատեց, որ խմբակցության առաջարկը չի ընդունվել Սահմանադրության խնդրի հետ կապված. «Եթե այսքանից հետո հասկանալի չի եղել, և դուք դեմ եք քվեարկելու, Ձեր որոշումն է»,-նշեց պատգամավորը։

«Լուսավոր Հայաստան» խմբակցության քարտուղար Գևորգ Գորգիսյանը գործընկերներին կոչ արեց դահլիճում մնալ կոռեկտության սահմաններում. «Ի՞նչ է նշանակում հասկանալի է եղել, հասկանալի չի եղել։ Քաղաքական կուսակցությունը, խմբակցությունը կարող է ունենալ դիրքորոշում և ունի և որևէ մեկին իրավունք չի վերաբերվում դրան տալ որևէ գնահատական ընդհուպ հասկանում եք, չեք հասկանում։ Քվեարկելու ենք այդպես, ձեր համար լավ է, թե վատ, դա այլ հարց է, բայց  խնդրում եմ գնահատականներ չտալ և կոռեկտ լինել միմյանց նկատմամբ»։

Աննա Կարապետյանի հեղինակած նախագծի որոշումն առաջին ընթերցմամբ չընդունվեց։

Խորհրդարանը, սակայն, կողմ քվեարկեց և երկրորդ ընթերցմամբ ու ամբողջությամբ ընդունեց «ՀՀ ընդերքի մասին օրենսգրքում» փոփոխություններ և լրացումներ կատարելու մասին և պետական տուրիքի մասին ՀՀ օրենքում լրացում կատարելու մասին օրենքների նախագծերի փաթեթը», «ՀՀ քաղաքացիական օրենգրքում» փոփոխություններ կատարելու մասին օրենքի նախագիծը», Վլադիմիր Վարդանյանի և Սիսակ Գաբրիելյանի ներկայացրած «ՀՀ քաղաքացիական օրենսգրքում» փոփոխություն և լրացում կատարելու մասին օրենքի նախագիծը»։

Աղբյուր` Փաստինֆո