Փաստ ինֆո

«Թյուրըմբռնում է եղել,  այդ օրը ես նոր բան չեմ ասել, քան ասել եմ հրապարակային՝ 2019թ մարտի 12 -ին Արցախ եւ Հայաստանի անվտանգության խորհուրդների համատեղ նիստին, որտեղ իմ ունեցած ելույթը հրապարակվել է։ Ես ասել էի, որ քանի դեռ Մադրիդյան սկզբունքներրի բոլոր պարամետրերը թափանցիկ չեն մեզ համար, մեզ դժվար է ասել՝ դա մենք ընդունո՞ւմ ենք որպես բանակցային գործընթացի հիմք, թե չենք ընդունում»-քիչ առաջ խորհրդարանում կառավարություն-ԱԺ հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը՝ անդրադառնալով եւ ԼՂ հակամարտության կարգավորման բանակցային գործընթացում Մադրիդյան սկզբունքների՝ օրակարգում լինել-չլինելու մասին հարցին։

Հիշեցնենք, այս հարցի հետ կապված Արցախի խորհրդարանի «Հայրենիք» խմբակցության ղեկավար Արթուր Թովմասյանը ուշագրավ բացահայտում էր արել: Մանրամասներ ներկայացնելով Արցախի «Ազատ Հայրենիք» կուսակցության նախագահ Արայիկ Հարությունյանի եւ կուսակցության խորհրդարանական խմբակցության անդամների հետ հանդիպումից նա «Առավոտ»-ին ասել էր, որ ՀՀ վարչապետ Նիկոլ Փաշինյանը մանրամասներ էր ներկայացրել բանակցային գործընթացից:  «Ասաց` Մադրիդյան սկզբունքները սեղանին չեն. սա շատ կարեւոր է, որովհետեւ մեր ժողովուրդը չընդունեց դրանք: Գաղտնի ոչ մի բան չի լինելու եւ ես ՀՀ վարչապետի անկեղծությանը հավատում եմ», -փոխանցել էր Արթուր Թովմասյանը:

Փաշինյանը խորհրդարանում հայտարարեց, թե Մադրիդյան սկզբունքները ԼՂ հարցի լուծման սկզբունքների ճանապարհն է։ «Մենք ուզում ենք հասկանալ ՝ այդ ճանապարհը մեզ ի՞նչ հնարավոր տեղեր կարող է հասցնել, ես հանդիպման ժամանակ հենց այս օրինակն եմ բերել, այստեղ էլ բացեմ՝ նույն ճանապարհով կարելի է գնալ Սեւան, Գավառ Դիլիջան, Վարդենիս, Իջեւան։ Մենք ասում ենք ՝ այս ճանապարհով կարելի է գնալ այս քաղաքները, բայց եթե պարզվի որ մեր մտադրությունը Արմավիր գնալն է, պետք չի գնալ ,  որովհետեւ այդ ճանապարհի բոլոր կածաններով պտտվենք, մեկ է՝ չենք հասնի Արմավիր»։

Ըստ Փաշինյանի, եթե վերջում որոշվի, որ բոլորը նույն տեղն են գնում ՝լավ, բայց եթե ոչ՝ ապա առնվազն մինչեւ Գավառի խաչմերուկը միասին կարելի է գնալ։ «Եթե պազվի,  որ մեկը ուզում է գնալ  Գյումրի, մյուսը՝ Երեւան, մյուսը՝ Արտաշատ՝ նշանակում է ինչ - որ մեկը ինչ- որ մեկին խաբում է եւ դրա մասին է խոսքը»։

Փաշինյանն անդրադարձել է նաեւ հայ –թուրքական հարաբերությունների վերաբերյալ Երեւանում ՌԴ ԱԳ նախարար Լավրովի հնչեցրած հայտարարություններին եւ այն հարցին, թե արդյո՞ք առաջարկ կա ՌԴ միջնորդությամբ հաշտեցման գործընթաց սկսելու։ «էլի այլաբանորեն պետք է պատասխանեմ, եթե ամիսը փետրվարն է  եւ ինչ- որ մեկը առաջարկի՝ Սեւանում լողանալ, այդ առաջարկը տրամաբանական չի լինի, առաջին ռեակցիան կլինի հակառակը։ Եթե ամիսը հուլիսն է, առաջարկի մեջ կլինի տրամաբանություն։  Տարածաշրջանային իրավիճակը եւ մթնոլորտը ցույց է տալիս, որ այդտեղ փետրվարն է, պետք է չէ իրերը հավաքվել ու գնալ լողանալու, որովհետեւ կարող ենք մրսել, թոքաբորբ ստանալ, էդպես մեկ անգամ եղել »,-հայտարարել է Նիկոլ Փաշինյանը։

Աղբյուր` Փաստինֆո