Փաստ ինֆո

ԵՊՀ հայ բանասիրության և պատմության ֆակուլտետների դասախոսները հանդես եկան հայտարարությամբ, որտեղ մասնավորապես ասված է.

«1.ԵՊՀ հայ բանասիրության և պատմության ֆակուլտետների պրոֆեսորադասախոսական կազմի գերակշիռ մասն իր համերաշխությունն է հայտնում ուսանողական շարժմանը՝ ի պաշտպանություն բուհերի ոչ մասնագիտական ֆակուլտետներում հայոց լեզու և գրականություն, հայոց պատմություն առարկաների պարտադիր ուսուցման դրույթի։

2.Հայտարարում ենք համերաշխության մեկօրյա նախազգուշական գործադուլ՝ որպես միաբանության քայլ։

3.Նախատեսում և ակնկալում ենք՝ կիրկանացվի հրատապ քննարկում բոլոր շահագրգիռ, իրավասու կողմերի և մասնավորապես ԿԳՄՍ նախարարի մասնակցությամբ՝ առանց քաղաքական շահարկումների։ Հորդորում ենք ուսանողությանը դադարեցնել դասադուլը»։

«Փաստինֆո»-ի թղթակցի հաղորդմամբ ԵՊՀ հայ բանասիրության ֆակուլտետի դասախոս Նարինե Դիլբարյանը հուսով է՝ Արայիկ  Հարությունյանը պատրաստ է քննարկմանը, քանի որ ինքն է հրապարակային նշել՝ պատրաստ է երկխոսության։ 

Հարցին, թե որոնք կլինեն նրանց հետագա քայլերը, եթե հանդիպումը չկայանա, Նարինե Դիլբարյանը նկատեց՝ իրենք դրական են տրամադրված. «Մենք որոշել ենք լինել լավատես, կարծեք թե այդ հրատապ հանդիպումը համընկնում է նաև ԿԳՄՍ նախարարի դիրքորոշման հետ, ուստի առայժմ դրական ենք տրամադրված, եթե չլինի կմշակվեն հետագա քայլերը»,-նշեց Նարինե Դիլբարյանը։

ԵՊՀ դասախոսները հանդիպումից ակնկալում են, որ կվերականգնվի օրենքի դրույթը, այսինքն հոայոց լեզուն և հայոց պատմությունը կմնան պարտադիր առարկայացանկում։

Դիտարկմանը, որ ԿԳՄՍ նախարարը չի հասկանում դժգոհությունը, քանի որ սա ակադեմիական ազատություն է, Նարինե Դիլբարյանն արձագանքեց. «Ակադեմիական ազատությունը մայրենի լեզվով մտածելու ազատության հետ հակադրության  մեջ չպետք է մտնի։ Մենք նշում ենք, որ մայրենի լեզուն այսօր պետական, համաշխարհային մակարդակի լեզու դառնալու համար անցնելիք ճանապարհ ունի և մեր բարձրագույն կրթություն ստացող ուսանողները պետք է սովորեն այդ լեզվով և՛ մտածել, և՛ հաղորդակցվել»,-նշեց դասախոսը։ 

Անդրադառնալով այն կարծիքին, որ ԱՄՆ-ում անգլերենը պարտադիր չէ, Նարինե Դիլբարյանն ընդգծեց, որ անգլերենը պարտադիր լեզու է արդեն ամբողջ աշխարհի համար. «ԵՊՀ դասախոսները, որպեսզի ստանան կարգավիճակ, հանձնում են համապատասխան մակարդակի անգլերեն։ Անգլերենը Ամերիկայի և Մեծ Բրիտանիայի ջանքերով վաղուց դարձել է միջազգային լեզու, դրա համար կարիք չունի։ Եկեք չհամեմատենք անհամադրելին»,-հավելեց դասախոսը։

Աղբյուր` Փաստինֆո