Փաստ ինֆո

ԱԺ «Իմ քայլը» խմբակցության պատգամավոր Սիսակ Գաբրիելյանը հայտնել է, որ մինչև Արսեն Բաբայանի համար երաշխավորություն ներկայացնելը զրուցել է իր քաղաքական թիմի հետ։

« «Իմ քայլի» դիրքորոշման համաձայն՝ կալանքը որպես խափանման միջոց պետք է կիրառվի բացառիկ դեպքերում։ Ես դիմել եմ, անձնական երաշխավորություն տալով, որ Արսեն Բաբայանը չի խուսափի նախաքննությունից և նախաքննական մարմնի պահանջով կներկայան»,-այս մասին այսօր լրագրողների հետ ճեպազրույցում ասաց Գաբրիելյանը։

Նա նշեց, որ երաշխավորությունն երեկ է ներկայացրել ու վճարել կես միլիոն դրամ։
«Ինչպես գլխավոր դատախազին ներկայացրած հիմնավորման մեջ եմ նշել, Արսեն Բաբայանին ճանաչում եմ դեռևս լրագրողական տարիներից, ճանաչում եմ նրա տեսակը»,-ասաց «Իմ քայլը» պատգամավորը։

Նա հայտնեց, որ պարբերաբար քննարկումներ է ունեցել իրավաբանների հետ, իր քաղաքական թիշի հետ և հասկացել, որ միջնորդության ներկայացման հարցում որևէ խնդիր չկա։

«Շատ դեպքում քաղաքացիները քննադատում են, որ այս մեկին բաց թողեցիք, մյուսին՝ ոչ, բայց այս մարդիկ վերջնական ազատ չեն արձակվում, քանի դեռ դատավարությունը չի կայացել և տվյալ անձի նկատմամբ դատարանի կողմից օրինական ուժով վճիռ չի եղել»,-ասաց պատգամավորը։

Հարցին, Դուք Արսեն Բաբայանին քաղբանտարկյալ համարու՞մ եք, «Իմ քայլը» պատգամավորը պատասխանեց. «Ես նրան քաղբանտարկյալ չեմ համարում»։ Լրագրողի դիտարկմանը, թե ինչու՞ չի համարում, իրավապաշտպաններ կան, որ նրան քաղբանտարկյալ են համարում, Գաբրիելյանը պատասխանեց. «Որովհետև ես իրավապաշտպան չեմ գուցե, նաև դրա համար։ Քաղբանտարկյալ չեմ համարում, առավել ևս, որ նա այլևս բանտարկյալ չէ»։

Աղբյուր` Փաստինֆո