Փաստ ինֆո

Ազգային ժողովում ԱԺ «Բարգավաճ Հայաստան» խմբակցության պատգամավոր Գևորգ Պետրոսյանի կողմից ներկայացված «Ընտանեկան օրենսգրքում» փոփոխություն և լրացում կատարելու հարցի քննարկման ժամանակ վիճաբանություն տեղի ունեցավ ԱԺ նախագահ Արարատ Միրզոյանի և հիմնական զեկուցող Գևորգ Պետրոսյանի միջև:

Պետրոսյանը երկու փոփոխություն էր առաջարկում՝ օրենքով արգելել նույնասեռականների ամուսնությունը և արգելել, որ նույնասեռականները կարողանան երեխա որդեգրել:

«Միևնույն է, մերժվելու է, բայց պիտի ասեմ՝ հարգելի գործընկերներ, այս մի նախագիծն էլ վերաբերում է նույնասեռականների կողմից երեխա որդեգրելու արգելքին, այստեղ ի՞նչը պետք է ստուգենք, եթե ամուսնության ժամանակ կասկած կա, որ նույնասեռական է, մի բան կարելի է ստուգել, այստեղ ի՞նչը պետք է ստուգել»,- ասաց նա:

Պետրոսյանը հորդորեց կատակը մի կողմ դնել և արժեքները պահել, ապա ասաց, որ հայ ազգը նահապետական ժողովուրդ և ավանդապաշտ ազգ է։

«Հիմա ինչու՞ ենք մոռացել այդ ամենը, չենք ասում սպանեք նրանց, բայց ասում ենք եկեք նման մարդկանց կողմից երեխա որդեգրելու արգելք սահմանենք։ Դա ազգային անվտանգության նկատառում ունի»,-ասաց ԲՀԿ պատգամավորն ու ավելացրեց, որ տարակարծություններ կարող են ունենալ, բայց այս հարցում պետք է միասնական լինել։

«Ի՞նչ է նշանակում երկու համասեռամոլ երեխա որդեգրեն, այդ երեխան ի՞նչ է մեծանալու, ինչքանո՞վ է ծառայելու մեր ազգային անվտանգության խնդիրներին: Որ այդպես խոսում եմ, ասում եք՝ մունաթով ես խոսում, բա ո՞նց խոսամ, ծափ տա՞մ այս թեմայով, ո՞վ ինձ կհասկանա, թող նախագիծը վերցնի, ուրիշը ներկայացնի, բայց պաշտպանենք մեր ազգային ավանդույթները։ Լավ, ամուսնությանը կողմ եղաք, գոնե սրան դեմ եղեք: Չեմ ուզում վիրավորել ոչ մեկին, բայց հիմա ով դեմ է քվեարկելու, այդ մարդը կուզենա՞ր իր ընտանիքում նման երևույթ տեսնել»,- ասաց Պետրոսյանը:

Նրա այս հայտարարությունը դուր չեկավ ԱԺ նախագահ Արարատ Միրզոյանին: Նա, դիմելով Պետրոսյանին, ասաց. «Ի՞նչ ես խոսում, էս ի՞նչ ես խոսում»:

Պետրոսյանն էլ հակադարձեց նրան. «ինչ ես չէ, ինչ եք խոսում»:

«Պարո´ն Պետրոսյան, ի՞նչ եք խոսում, ասում եք՝դուք կուզանաք ձեր ընտանիքում... այդ ի՞նչ անձնավորված բաներ են, մի հատ էլ քֆուր դնեիք քվեարկելու վրա»,- ասաց Արարատ Միրզոյանը:

Միրզոյանի այս դիտարկմանը Գևորգ Պետրոսյանը պատասխանեց, որ ոչ մեկի անուն չի տվել, որ անձնավորված չէ իր ասածը:
«Այս ձևն արդեն չափ ու սահման չունի: Հիմա մեկը կանգնի ասի՝ էս օրենքին ով որ դեմ քվեարկի, իր ընտանիքում սենց- նենց է: Այս հարցը պետք է կարգավորվի, սենց չի կարող մնալ»,- ասաց նա, ապա ԱԺ աշխատակիցներից մեկին խնդրեց գտնել հոդվածը, ըստ որի կարգավորվում է ձայնից զրկելու հարցը։

Աղբյուր` Փաստինֆո