Փաստ ինֆո

Ուսանողների եւ ՀՅԴ երիտասարդների՝ «Արայիկ , հեռացիր» բացականչությունների ներքո վարչապետ Նիկոլ Փաշինյանը քիչ առաջ մտավ արտգործնախարարության շենք ՝ երիտասարդ դիվանագետների երդման արարողությանը եւ դիվանագիտական դպրոցի ստեղծման տասնամյակին նվիրված միջոցառմանը մասնակցելու։

ԱԳՆ-ի ճանապարհին Փաշինյանը կարճ զրույց ունեցավ ԿԳՄՍ նախարարության շենքի առջեւ նստացույց անող երիտասարդների հետ, որոնք պահանջում են ԿԳՄՍ նախարար Արայիկ Հարությունյանի հրաժարականը։

Ակցիայի մասնակիցներից մեկը Փաշինյանից հետաքրքրվեց, թե ինչպե՞ս է գնահատում նախարարի բառամթերքը։

«Բառամթերքը ի՞նչ կապ ունի»,-զարմացավ Փաշինյանը։ Աղջիկն ասաց, որ 25 տարեկան է, Դաշնակցական է, որոշել է ապրել Հայաստանում, բայց նախարարը բոլոր դաշնակցականներին , որոնք անհամաձայնություն են հայտնել իրեն, անվանել է անդաստիարակ։ «Լավ էլի, ո՞նց կարա ժամանակակից Հայաստանում անհամաձայնություն արտահայտած մարդուն անվանեն...Ուղիղ ասեմ՝ ձեր պահանջներից ոչ մեկը չեմ կիսում, ձեր գնահատականներից ոչ մեկը չեմ կիսում»-հայտարարեց Փաշինյանը։

Հիշեցնենք, երիտասարդները Արայիկ Հարությունյանի հրաժարականը պահանջում հայագիտական առարկաները բուհերում ոչ պարտադիր դարձնելու մտադրության, աղմկահարույց «ՀուԶանք ու Զանգ» ներկայացման եւ «Մել» ֆիլմի ֆինանսավորման համար, որը ծանրորդուհի Մելինե Դալուզյանի սեռափոխության մասին է պատմելու։

Ակտիվիստները Փաշինյանին մետրոյի ժետոն տվեցին՝ Արայիկ Հարությունյանին փոխանցելու համար, որ մետրոյով երթեւեկի ու տեսնի, թե ինչ է իր մասին հասարակությունը մտածում։ «Իսկ հասարակությունը ի՞նչ է ասում, խնդրում եմ ձեր բարձրաձայնած խնդիրը ասեք, որ ինչ-որ թալանչի լիներ, ընդունելության քննություններին փող առներ, չէիք բողոքի չէ՞։ Արայիկ Հարությունյանը չի իրանացնում կրթական քաղաքականությունը, կառավարությունն է իրականացնում եւ ես երեկ մանրամասն անդրադարձել եմ, չեմ կիսում էն տեսակետը, որ փորձ է արվում վախեր սերմանել, որ ինչ-որ մարդիկ ապազգային են, ինչ-որ մարդիկ՝ ազգային։ ՀՀ-ում մեր կառավարությունից ավելի ազգային կառավարություն դեռ չի եղել»,-արձագանքեց Փաշինյանը, ինչին ի պատասխան ակտիվիստը նշեց, թե կեղծ դիսկուրս է հասարակությանը բաժանել առաջադեմի ու հետադեմի եւ նկատեց, որ նախարարը խուսափում է լսել իր ընդդիմախոսներին։ Փաշինյանն ասաց՝ եթե նման խնդիր կա, երաշխավորում է, որ երիտասարդներին նախարարը կլսի։

«Դաշնակցական երիտասարդները իրավունք ունեն խոսելու՞ կրթության, գիտության, մշակույթի եւ սպորտի ոլորտից»,-Փաշինյանին դիմեց ցուցարար Արգիշտի Գեւորգյանը եւ դրական պատասխան ստանալով հավելեց.«Պարոն նախարարը մեզ արգելել է խոսել այդ ոլորտներից՝ կուսակցական պատկանելությունից ելնելով»։

Փաշինյանն էլ հորդորեց չնենգափոխել փաստերը։

Հիշեցնենք, «Ազատության» եթերում նախարար Հարությունյանը հայտարարել էր, որ ով խոսի կրթությունից և այս ոլորտից, տեղի Դաշնակցությունը իրավունք չունի՝ այն ավերածություններից հետո , որ Լևոն Մկրտչյանն ու նրա գործընկերներն են բերել ոլորտին։

Մի երիտասարդ էլ նկատեց, թե նախարարը բացասական եզրակացություն է տվել ուսանողների կրթաթոշակների բարձրացմանը, բայց իր աշխատավարձի բարձրացմանը շատ լավ է վերաբերվում։ Կողքից Փաշինյանին նաեւ հիշեցրին, որ Արայիկ Հարությունյանը Ֆեյսբուքում «տասովշիկ», «մուտիլովշիկ» բառերն է օգտագործում խնդրի հետ կապված գրառումներում։

Վարչապետը փորձեց երիտասարդներին հանդարտեցնել, ասաց.«Մենք բոլորս կովկասցի ենք...»։ Այստեղ էլ Փաշինյանին ուղղեցին, թե մենք կովկասցի չենք, արիացի ենք...

Հետո երիտասարդները դժգոհեցին, որ «Մել» ֆիլմը պետական ֆինանսավորում է ստացել. «Ձեր երեխաները, իմ սերունդները ֆիլմը տեսնելով ի՞նչ ուղերձ են ստանում, զուգահեռ մերժվում է մեր արքա Վարազդատի մասին պատմող ֆիլմը, «Հայ ասպետ»-ը» ։ Վարչապետը հակադարձեց, թե նա չեմպիոն է, Հայաստանի դրոշն է բարձրացրել , բայց երիտասարդները հիշեցրին, որ «Հայկական ժամանակ»-ի հետ հարցազրույցում ֆիլմի ռեժիսորն ասել է, որ այն սեռափոխության մասին է։ «Իմ ընկալմամբ, ֆիլմը մարդու մասին է ։ Մենք ֆինանսավորում ենք ֆիլմի այն հատվածը, որը չեմպիոնի մասին է»,-հայտարարեց Նիկոլ Փաշինյանը ։

Աղբյուր` Փաստինֆո