Փաստ ինֆո

Փաշինյանական կաբինետի կրթության և գիտության ոլորտի պատասխանատու Արայիկ Հարությունյան- Հայ հեղափոխական դաշնակցություն ճակատամարտը կարմիր գծեր է հատում արդեն: Ընդ որում, հեղինակը նախևառաջ պետական պաշտոնյա Արայիկ Հարությունյանն է:

Տարօրինակ է, սակայն ներկա իշխանությանը թվում է, թե այն, ինչ իրենք անում են անքննադատելի է և որպես արդյունք բացառապես օվացիաներ պիտի լինեն կոնկրետ ոլորտներում իրենց նախաձեռնած նորամուծություններին ի պատասխան:
Այն, որ հենց ԵՊՀ տարբեր ֆակուլտետների ուսանողներն սկսեցին դասադուլային բողոքի շարժում՝ ընդդեմ ԿԳՄՍ նախաձեռնած

«Բարձրագույն կրթության մասին» օրենքի նախագծի, ըստ որի` «Հայոց լեզու», «Հայ գրականություն» և «Հայոց պատմություն» առարկաները պարտադիր չեն լինելու ոչ մասնագիտական ֆակուլտետների ուսանողների համար, օրինաչափ է նույնքան, որքան այն, որ այս նախագծի դեմ հայտարարությամբ առաջին հանդես եկողը դաշնակցությունը եղավ:

Նոյեմբերի 4-ին ՀՅԴ երիտասարդական միությանն իր տարածած հայտարարությամբ ԿԳՄՍ նախարարի հրաժարականի պահանջ դրեց: Իսկ երեկ նախարարի հրաժարականը պահանջող ուսանողները հայտարարեցին, որ անժամկետ նստացույց են սկսում:

Այս պահից սկսած՝ կրթության և գիտության ոլորտի պատասխանատու Արայիկ Հարությունյանն ընդդիմադիր ճակատում գտնվող ՀՅԴ-ի հանդեպ որդեգրեց սպառնալիքների և շանտաժի տոնայնությունը՝ հայտարարելով բառացիորեն հետևյալ տեքստը. « Ճիշտն ասած որոշել եմ այն արկղերը, որ բերել են, լցնեմ տասնյակ եւ անգամ ավելի քրեական գործերով, որոնք վերաբերում են այս ոլորտին եւ հետ ուղարկեմ իրենց: Այդ գործերը դատախազությունը, քննչական մարմինները բազմաթիվ անգամ ներկայացրել են: Մենք խնդրել ենք այդ մարմիններին տրամադրել այդ գործերի ցանկերը, եւ այդ արկղերը նրանք հետ կստանան այդ գործերով»: Ըստ նրա՝ նրանք սկսեցին աղմկել հատկապես կրթության ոլորտի բարեփոխումներից հետո, որովհետեւ տապալել են բազմաթիվ անգամ այս ոլորտի համակարգումը:

Եվ այսպես, պարզվում է, կրթության ոլորտի պատասխանատուն իր բուն բան ու գործը թողած՝ լծվել է իր քաղաքական հակառակորդների դեմ կոմպրոմատներ հավաքելուն: Այն, որ ներկա իշխանությունը նման հրահանգ տվել է բոլոր գերատեսչությունների հետ կապված, նախկինում էլ անդրադարձել ենք: Հիշենք թեկուզ, այսպես կոչված ազդարարի ինստիտուտը, որ ստեղծվել է տարբեր նախարարություններում:

Արդյունքում՝ ներկա իշխանությունն ի սկզբանե սկսեց տարբեր ոլորտների հետ կապված քրեական գործեր հարուցել, հնչեղ անուններ բարձրաձայնել, սակայն, ոչ ավելին: Գագիկ Խաչատրյանի, Գագիկ Բեգլարյանի, Գագիկ Ծառուկյանի և այլոց անուններն օդում կախված էլ մնացին, քանի որ իրավապահ մարմիններն առայսօր մեղադրանք չեն առաջադրել նրանց դեմ: Չեն առաջադրել, բայց և՝ գործերը չեն էլ կարճել: Պահում են:

Պահում են՝ որպես պատից կախված հրացան, որ երբ իրենց քիմքին հաճելի լինի, կրակի այն: Գործը բաց պահելուն զուգահեռ մի կողմից վախի մեջ են պահում այս կարգի մարդկանց, մյուս կողմից էլ՝ իշխանական հիմնադրամին մուծումներ անել պարտադրում:

Կարող եք նաև այսպես մտածել՝ ուրիշ էլ ո՞վ, եթե ոչ՝ ՀՅԴ-ն
Ասացեք, խնդրեմ, ի՞նչ է նշանակում Արայիկ Հարությունյանի այս խոսքերը՝ «Եթե տեսել եք, ես 1,5 տարվա ընթացքում ես որեւէ անդրադարձ չեմ կատարել իմ նախորդի՝ Լեւոն Մկրտչյանի գործունեությանը՝ կարծելով, որ դա ինձնից որոշ չափով ժամանակ է տանում, բայց խորամուխ կլինեմ դրանում»:

Կրթության ոլորտի պատասխանատուի՝ շանտաժի լեզվով խոսելու այս եղանակը տխուր ժամանակների զուգորդումներ է առաջացնում, երբ ինչ-որ մեկի սուտ մատնությամբ մարդկանց տանում կորցնում էին սիբիրներում: Եթե այն ժամանակ մուղդուսիները կարող էին խեղճուկրակ մի գյուղացու ասել ՝« էսեռ» ես ու աքսորել, որը հետո պիտի պատմեր, թե՝ իրեն ասին ՝« սիսեռ» ես ու աքսորեցին որպես ժողովրդի թշնամու, ապա այսօր էլ՝ գործողությունների նպատակը նույնն է, ուղղակի եղանակներն ու ժամանակներն են այլ: Վկա՝ վաստակաշատ բժիշկ, բժշկագիտության պրոֆեսոր, պետական գործիչ Արա Բաբլոյանի հետ մեր աչքի առաջ կատարվող գործընթացները:

Ինչ վերաբերվում է Արայիկ Հարությունյանի՝ ՀՅԴ-ին ուղղված՝ «ով-ով խոսի կրթությունից» ձևակերպմանը, ապա հարկ է ուղղակի ասել՝ ուրիշ էլ ով, եթե ոչ՝ ՀՅԴ-ն:

Ի վերջո, ՀՅԴ-ն անմիջականորեն է կապված այդ ոլորտին, ոչ միայն նրա համար, որ հայագիտական առարկաների և հայ ոգու շնորհիվ սփյուռքում կարողացել է մեկ հարյուրամյակից ավելի հայապահպանական գործունեություն իրականացնել, այլև նրա համար, որ ԵՊՀ ստեղծումը անմիջականորե՛ն առնչվում է Հայաստանի առաջին հանրապետության ԿԳ նախարար, հասարակական-քաղաքական գործիչ, գրականագետ և մանկավարժ,Նիկոլ Աղբալյանի անվան հետ:

Մարինե Մինասյան

Աղբյուր` Փաստինֆո