Փաստ ինֆո

Գեղարքունիքի մարզի ընդհանուր իրավասության դատարանի դատավոր Ավագ Գաբրիելյանի՝ «Պորշ Կայեն» մակնիշի ավտոմեքենայի լուսարձակների գողության մեջ մեղադրվողը 2 տարի կալանքի տակ մնալուց հետո գրավի կիրառմամբ ազատ է արձակվել: Մեղադրյալի պաշտպան Արսեն Մկրտչյանը «Փաստինֆո»-ի թղթակցի հետ զրույցում նշեց, որ 2 տարի կալանքի տակ պահելուց հետո, ի վերջո, դատարանը բավարարել է միջնորդությունը՝ մեղադրյալի նկատմամբ որպես խափանման միջոց ընտրված կալանավորումը գրավով փոխարինելու վերաբերյալ և որպես գրավի չափ է սահմանել 1 միլիոն դրամը:

Ավելի վաղ «Փաստինֆո»-ն տեղեկացրել էր, որ Գաբրիելյանի «Պորշ Կայեն»-ից մեկ անգամ չէ, որ գողություն է կատարվել: Դատավորի ավտոմեքենայից գողությունները կատարվել են Կենտրոն վարչական շրջանում՝ դատավորի բնակության վայրի շենքի բակից, սակայն առնվազն տարակուսելի է, որ նման թանկարժեք ավտոմեքենա ունեցող դատավորը, ով մի քանի անգամ հանցագործների թիրախում է հայտնվել, ավտոտնակ ձեռք բերելու ուղղությամբ միջոցներ չի ձեռնարկել: Արթուր Հարությունյանի վերաբերյալ քրեական գործը մուտք է եղել Երևան քաղաքի առաջին ատյանի ընդհանուր իրավասության դատարան դեռևս 2017թ. մարտին և մինչ այսօր դատավոր Գագիկ Պողոսյանը դատական ակտ չի կայացրել:

Հայտնի է նաև, որ մեղադրյալ Արթուր Հարությունյանին նախաքննության փուլում 45 դրվագով է մեղադրանք առաջադրվել, իսկ գործը դատարան է ուղարկվել 12 դրվագով՝ ՀՀ քրեական օրենսգրքի 177-րդ հոդվածի 2-րդ մասի 1-ին և 2-րդ կետերով, 38-34-177 –րդ հոդվածի 2-րդ մասի 1-ին և 2-րդ կետերով և 38-177-րդ հոդվածի 1-ին մասով: Արթուր Հարությունյանի պաշտպան Արսեն Մկրտչյանը մեզ հետ զրույցում նաև նշեց, որ իր պաշտպանյալը չի ընդունել առաջադրված մեղադրանքը, ավելին, պնդել է, որ որևէ կապ չունի այդ գողությունների հետ: Նույն քրեական գործով ամբաստանվում է նաև Ժորա Սարգսյանը, սակայն վերջինիս նկատմամբ ի սկզբանե խափանման միջոց է ընտրված եղել չհեռանալու մասին ստորագրությունը:

Հեղինակ՝ Էլեն Առաքելյան

Աղբյուր` Փաստինֆո