Փաստ ինֆո

2018 թվականի ապրիլին Հայաստանում տեղի ունեցած իշխանափոխությունը նախապես ծրագրված է եղել, որը փաթեթավորվել է թատերականացված հեղափոխական ներկայացմամբ։ «Փաստինֆո»-ի հետ զրույցում նման կարծիք է հայտնել քաղտեխնոլոգ Արմեն Բադալյանը։

«Նախօրոք ծրագրված  պլանավորում է եղել, թե ինչպես պետք է Հայաստանում իշխանությունը փոխանցվի։  3-րդ նախագահը պետք է հեռանար, իսկ  թե ով պետք է նրան փոխարիներ, դա մի քիչ ծրագրված չէր։ Դա պլանավորված գործողություն էր, որը փաթեթավորվեց թատերական հեղափոխական ներկայացմամբ։ Այնպես չէ, որ քայլելով եկավ ու  իշխանությունը վերցրեց, այդպես չի լինում»։

Ըստ քաղտեխնոլոգի, հայ հասարակությունը մեկ անգամ է իշխանությունը  փոխել՝  1988-ի ազգային զարթոնքի արդյունքում։

«Շատ հարցեր կան, որոնց պատասխանները փորձագետները  չեն կարողանում տալ, իսկ այդ հարցերից պարզ է դառնում,  որ ամեն բան նախապես մշակված է եղել, երբ Սերժ Սարգսյանը հանդիպել է Օլանդի հետ 2017 թվականի մարտին։ Այն ժամանակ արդեն իրեն ասել էին՝ դու պետք է գնաս, բայց  գնալու ձեւ կար։ Ձեւը մտածվեց այսպես»,-կարծում է Բադալյանը։

Ըստ  քաղաքագետի  ՀՀ 3-րդ նախագահի հեռացման ծրագիրը մշակվել է ԵՄ-ի եւ արեւմտյան գլոբալիստների կողմից. «Իրենք են հեռացրել՝  որոշակի երաշխիքներով, որոնք Նիկոլ Փաշինյանի կողմից պահպանվում են»։

Արմեն Բադալյանի խոսքով, սակայն, Նիկոլ Փաշինյանի իշխանության գալը  ծրագրված չէր ։ 

«ԵՄ –ի եւ  Արեւմուտքի գլոբալիստների շահերի համընկնում կար, որ 3-րդ նախագահը պետք է գնա, բայց, թե ապագան ինչպես պետք է զարգանա, թե ԱՄՆ-ը, թե ԵՄ-ն տարբեր խնդիրներ են  իրենց առջեւ դնում, անգամ  ԱՄՆ-ում Թրամփի թեւը եւ գլոբալիստների թեւը  այլ խնդիրներ են իրենց առջեւ դնում։ Հիմա ամեն բան խառնվել է եւ դրա համար դուք տեսաք բավականին լավ տեխնոլոգիական գործընթաց՝ փողոցներ փակելը, քաղաքացիական անհնազանդությունը եւ այլն, բայց դրանից հետո դուք չեք տեսնում այլեւս  որեւէ զարգացում, որովհետեւ զարգացման խնդիր դրված չէր»,-նշեց Արմեն Բադալյանը։  

Ըստ քաղտեխնոլոգի, Փաշինյանը պետք է, այսպես ասած,  ջարդեր գերանը եւ պետք է  ցույց էր տալու, որ Հայաստանում հեղափոխություն է եղել. «Ժողովուրդը մասովկայի դեր է  կատարել։ Այո, դրա համար աշխատել են, հատկապես աշխատել են երիտասարդ  աղջիկների վրա, որովհետեւ նրանք զգացմունքով են հարցերին մոտենում, աշխատել են, փողոց են փակել»։

Ինչ վերաբերում է Նիկոլ Փաշինյանի վարչապետությանը, ըստ քաղտեխնոլոգի, այս ծրագիրը մշակած շրջանակները, թեեւ դա չեն պլանավորել, բայց, ըստ էության, դեմ չեն եղել, եթե Փաշինյանը կարողանար իրեն դրսեւորել։

«Մենք տեսնում ենք, որ  ԵՄ-ի հետ որեւէ հարաբերություն չկա, սառեցված հարաբերություններ են , իսկ ԱՄՆ-ում  հստակ չէ՝ Թրամփն է, թե՞ գլոբալիստներն են։ Եթե գլոբալիստներն եկան,  դա այլ հարց է, եթե թրամփիստները մնացին՝ այլ հարց է։ ԵՄ-ում էլ ազգայնական-գլոբալիստներ  շարժեր եղան, այսինքն, պատվիրատուները մի քիչ փոխվեցին»։

Անդրադառնալով Ռուսաստանի դերակատարությանը՝  Արմեն Բադալյանն ասաց, թե այսօր այնտեղ հրաշալի գիտեն, թե Հայաստանում ինչ է կատարվում, պարզապես հրահանգ չկա՝ ցույց տալ այդ  թերությունները։

Ըստ Բադալյանի, 2018-ի ապրիլ-մայիսյան իրադարձությունների ժամանակ Ռուսաստանին փաստի առաջ կանգնեցրին ։ «Այն կողմից ոչ ոք  չէր մտածում, որ այս աստիճանի փաստի առաջ կկանգնեն։ Ձեզ մոտ հարց չի՞ առաջանում, թե ՀՀ 3-րդ նախագահը, որը հրաժարական է տվել, այս մեկ ու կես տարվա ընթացքում ինչո՞ւ ոչ մի անգամ Ռուսաստան չի գնացել, ինչո՞ւ չի գնում»,- եզրափակեց քաղտեխնոլոգը։

Աղբյուր` Փաստինֆո