Փաստ ինֆո

«Եթե քրեական գործերով արկղեր ունի Արայիկ Հարությունյանը, ապա հենց հիմա թող իջնի ներքև, մենք իրեն օգնենք այդ արկղերը տանել ոստիկանություն և այդ քրեական գործերը հանձնել ոստիկանությանը, որովհետև մենք երիտասարդներս կարծում ենք, որ ՀՀ-ում ցանկացած իրավախախտում կատարած անձ պետք է պատժվի օրենքի ողջ խստությամբ։ Եթե չկան այդ արկղերը, թող մերկապարանոց հայտարարություններ չանի, որովհետև եթե հիմա դրան չեն հաջորդելու այդ արկղերի տարհանումը դեպի Ոստիկանություն, ուրեմն Արայիկ Հարությունյանը ևս մեկ անգամ վկայում է իր ստախոսության մասին»,- «Փաստինֆո»-ի հետ զրույցում ասաց կրթության, գիտության, մշակույթի և սպորտի նախարար Արայիկ Հարությունյանի հրաժարականը պահանջող բողոքի ակցիայի կազմակերպիչներից Արգիշտի Գևորգյանը։

Հիշեցնենք, որ արդեն երկրորդ օրն է ինչ դաշնակցական երիտասարդները բողոքի ակցիա են իրականացնում Կրթության, գիտության, մշակույթի և սպորտի նախարարության մոտ. նրանք պահանջում են ԿԳՄՍ նախարար Արայիկ Հարությունյանի հրաժարականը։
Օրեր առաջ երիտասարդները դատարկ արկղեր էին տարել նախարարության մոտ, որպեսզի Հարությունյանը դրանցում դասավորի իրերը՝ հրաժարական տալուց հետո։ Նախարարն էլ արձագանքել էր ակցիային ու ասել, որ այդ արկղերը քրեական գործերով լի է հետ վերադարձնելու։
Ակցիայի ղեկավարը նշեց, որ եթե իրականում այդ քրեական գործերը կային, ապա ինչն էր խանգարում Հարությունյանին դրանք բացահայտել ամիսներ առաջ ու պատժել մեղավորներին։
«Թե՞ կոմպրոմատ էր, որ պետք է պահվեր նման դեպքերի համար։ Եթե ուղղակի դա վախեցնելու միջոց է, ապա մեր՝ երիտասարդներիս հետ, այդ լեզվով խոսելն ոչ մի կերպ չի արդարացվում, մենք նման բաներից վախեցողը չեմ»,-ասաց Գևորգյանը։

Ակցիայի կազմակերպիչն ասաց, որ «գործ կարելու» մշակույթը Հայաստանում վաղուց կա և այս իշխանություններն էլ բացառություն չեն։

«Չենք վախենում հնարավոր գործ կարվելուց, որովհետև դրանք վաղ թե ուշ արդարացվում են, մանավանդ մեր կուսակցությունը նման գործելաոճի զոհ դարձել է, բայց արդեն արդարացվել են բոլորը։ Ես էլ աշխատում եմ այլ ոլորտում, իմ մասին էլ, եթե կարող են որևէ իրավախախտում հայտնաբերել, ապա խնդրեմ իհարկե, ես էլ պատիժս կրել եմ, եթե հանցանք եմ արել»,-ասաց Գևորգյանը։

Հեղինակ՝ Սոնա Գեւորգյան

Աղբյուր` Փաստինֆո