Փաստ ինֆո

Ունենք 6 ուսուցիչ, որոնք Խաչաղբյուր գյուղից երթևեկում են Լճավանի դպրոց։ Քանի որ ավտոբուս չկա, ստիպված տաքսիով են գալիս դպրոց և հետ վերադառնում իրենց գյուղ, իսկ գյուղի պայմաններում ամեն օր տաքսիով երթևեկելը ֆինանսապես դժվար է։ «Փաստինֆո»-ի հետ զրույցում այս մասին ասաց Գեղարքունիքի մարզի Լճավանի դպրոցի տնօրեն Նորայր Գևորգյանը։

Նշենք, որ քիչ առաջ ԱԺ «Իմ քայլը» խմբակցության պատգամավոր Թագուհի Թովմասյանն էր ահազանգել այն մասին, որ Լճավան համայնքի մի շարք ուսուցիչներ չեմ կարողանում դպրոց հասնել, քանի որ Վարդենիսի տարածաշրջանում ներմարզային ուղևորափոխադրումներ իրականացնող «Շամա-տրանս» ՍՊ ընկերությունը հրաժարվում է երթուղին սպասարկել, ինչի հետևանքով ուսուցիչներն իրենց աշխատավարձի «առյուծի բաժինը» ստիպված ծախսում են ճանապարհի վրա։

Նորայր Գևորգյանը պատմում է՝ նախկինում ավտոբուսն աշխատել է երկուշաբթի և հինգշաբթի օրերին, սակայն վեց ամիս առաջ դադարեցրել է սպասարկել երկուշաբթի օրը։ Խնդիրը ավելի սրվեց, երբ չորս շաբաթ առաջ ընկերությունը դադարեց երթուղին սպասարկել նաև հինգշաբթի օրերը, ինչի հետևանքով այժմ ընդհանրապես ավտոբուս չի աշխատում։

«Ուսուցիչներն իրենց աշխատավարձի մի մասը հատկացնում են տաքսով գնալ-գալուն։ Շաբաթվա մեջ մեկ օր գոնե 400 դրամով էին գալիս-գնում, դա էլ կտրվեց։ Հիմա շաբաթվա մեջ չորս օր են գալիս, այդ մեկ օրը խտացրել ենք, որ ուսուցիչների համար լրացուցիչ գումար չլինի, բայց այդ չորս օրվա համար էլ ծախսում են այնքան գումար, որ համարյա իրենց ստացածն է»,-ասաց Նորայր Գևորգյանը։

Երբ ներմարզային ուղևորափոխադրում իրականացնող ընկերությունը սկսել է միայն մեկ օր սպասարկել երթուղին, դպրոցի տնօրենը դիմել է մարզպետարանի տրանսպորտային բաժին, որտեղ, սակայն, պատասխանել են, որ գիծը սեփականատեր ունի, և դա սեփական երթևեկություն է։ Նորայր Գևորգյանն այժմ առաջին հերթին մտածում է իր աշակերտների կրթության որակի մասին։ Նշում է՝ դպրոցում սովորում են բարձր առաջադիմությամբ երեխաներ, որոնց մեծ մասը սեփական գիտելիքներով ընդունվում են երևանյան բուհեր։ Նորայր Գևորգյանը նկատեց, եթե ուսուցիչները մի քանի օր չգան, ապա ո՞վ է աշակերտներին փոխանցելու այդ գիտելիքը։ Հարցին՝ արդյոք չորս շաբաթների ընթացքում ուսուցիչները բացակայել են և ուսումնական գործընթացը խախտվել է, տնօրենն ասաց. «Իհարկե ոչ, եթե ուսուցիչը չգա, մեզ մոտ փոքր դպրոց է ի՞նչ ենք անելու։ Օրինակ մաթեմատիկայի ուսուցիչը 17 դասաժամ ունի, եթե ինքը չգա այդ ժամերն ազատ են մնում, իսկ փոքր դպրոցները փոխարինող ուսուցիչներ չունեն։ Ծանր վիճակի մեջ ենք ընկնում»,-հավելեց Նորայր Գևորգյանը։

«Փաստինֆո»-ն հարցի շուրջ զրուցեց նաև Լճավանի համայնքապետ Լյովա Գևորգյանի հետ, վերջինս սակայն վստահ չէ՝ ինչու է ընկերությունը դադարեցրել սպասարկել երթուղին. «Չգիտեմ՝ ինչու չի գալիս։ Մի քանի ամիս առաջ եմ խոսել, ասաց՝ հնարավոր է դադարեցնի, որովհետև ֆինանսական խնդիրներ ունի»,-ասաց համայնքապետը՝ վստահեցնելով, որ պատճառը բացառապես ֆինանսական է։

Հարցին՝ մարզպետի հետ զրուցե՞լ է և քննարկվում է արդյոք այլընտրանքային տարբերակ, համայնքապետը բացասական պատասխան տվեց։

Հեղինակ՝ Հասմիկ Կոշկարյան

Աղբյուր` Փաստինֆո