Փաստ ինֆո

Շարքային կազմի պարտադիր զինվորական ծառայության 2019 թվականի ձմեռային զորակոչն այս տարի կսկսի դեկտեմբերի 16-ից։ Այս մասին համապատասխան որոշումն ընդունվեց կառավարության այսօրվա նիստում։

«Պարոն վարչապետ ասեմ, որ այս տարի նախատեսվում է բուն զորակոչը սկսել ավելի շուտ՝ դեկտեմբերի 16-ից, հաշվի առնելով, որ հունվարի առաջին տասնօրյակում գրեթե զորակոչ չի լինում՝ ոչ աշխատանքային օրերի հետ կապված»,-ասաց Պաշտպանության փոխնախարար Գաբրիել Բալայանը՝ հավելելով, որ զորակոչի նախապատրաստական աշխատանքները նախատեսում են սկսել նոյեմբերի 14-ից։

Գաբրիել Բալայանն ասաց, որ նախագծի երկրորդ հավելվածով սահմանվում է զորակոչային հանրապետական հանձնաժողովի կազմը, իսկ երրորդ հավելվածով՝ կենտրոնական բժշկական հանձնաժողովի անհատական կազմը. «Այս տարի նորություն ունենք, որ առաջարկել ենք և շնորհակալ ենք առողջապահության նախարարության գործընկերներին, իրենց համաձայնությունն ունենք, որ նախագահելու է ոչ թե հանրապետության զինվորական կոմիսարը, այլ առողջապահության փոխնախարարը»,-նշեց փոխնախարարը։

Առողջապահության փոխնախարար Անահիտ Ավանեսյանը, սակայն, ասաց, որ երրորդ հավելվածի հետ անհամաձայնություն կա. «Բանավոր քննարկումներ են եղել, որի ժամանակ քննարկված կազմը չի համապատասխանում նախագծի մեջ ներառված կազմին։ Չենք պատրաստվում համաձայնություն տալ»,-ասաց ԱՆ փոխնախարարը։

ՊՆ փոխնախարար Գաբրիել Բալայանը վստահեցրեց, որ նախքան վարչապետի ստորագրմանը ներկայացնելը՝ կաշխատեն, համաձայնեցված տարբերակով կներկայացնեն այն ստորագրմանը։

Աղբյուր` Փաստինֆո