Փաստ ինֆո

«Օրակարգում ունեինք մեկ հարց ՝ Ազգային հավաքականի գլխավոր մարզչի նշանակման հարցը, առաջադրվել է պարոն Խաշմանյանի թեկնածությունը, գործկոմի բոլոր անդամները կողմ են քվերակել եւ այս պահից նա հանդիսանում է հավաքականի գլխավոր մարզիչ»,-լրագրողների հետ ճեպազրույցում քիչ առաջ ասաց ՀՖՖ նախագահ Արթուր Վանեցյանը՝ անդրադառնալով ազգային հավաքականի մարզչի նշանակման շուրջ ստեղծված աղմուկին։

«Իրականում որեւէ խնդիր չի եղել, երկրաշարժ չի եղել, ստացվեց այնպես, որ աղմուկը շատ բարձրացավ եւ սեւեռվեց հասարակական ուշադրությունը։ Եղել է իրավական կազուս, ՀՖՖ-ում կնշանակվի ծառայողական քննություն եւ համապատասխան մարդիկ կպատասխանեն այդ հարցին եւ համապատասխան վերաբերմունք կդրսեւորվի նրանց նկատմամբ»,-ասաց Վանեցյանը՝ պարզաբանելով, որ հունիսի 19 –ին տեղի է ունեցել ՀՖՖ ընդհանուր ժողովը, հաստատվել է նոր կանոնադրությունը, որով գլխավոր մարզչի նշանակումը վերապահված է ՀՖՖ նախագահին։ Հունիսի 26 - ին որոշումն ընդունվել է ընդհանուր ժողովի կողմից, որից հետո որոշումը պետք է մուտքագրվեր պետռեգիստրում, որպեսզի ստանար պետական գրանցում։

«Ինչ- ինչ պատճառներով մուտքագրվել է հոկտեմբերի 25 –ին եւ 10 աշխատանքային օր է պահանջվում, որ ԱՆ պետռեգիստրում այն գրանցվի։ ֆորմալ առումով ժամկետը լրանում է վաղը»։ ՀՖՖ աշխատակազմը չի տեղեկացրել իրեն այդ մասին եւ փաստորեն, եղել է տեխնիկական հարց, պարզապես համապատասխան աշխատակիցը փորձել է ավելորդ խոսակցությունից խուսափել։

«Փաստինֆո»-ն տեղեկացրել էր, որ ՀՖՖ գործադիր կոմիտեի նիստ է ընթանում, որի քննարկման թեման ազգային հավաքականի գլխավոր մարզչի նշանակման հարցն է։ Նոյեմբերի 6-ի ՀՖՖ-ն հայտնեց Աբրահամ Խաշմանյանին Ֆուտբոլի ազգային հավաքականի գլխավոր մարզիչ է նշանակվելու մասին, որից հետո երեկվանից իշխանության ներկայացուցիչները ՀՖՖ նախագահ Արթուր Վանեցյանին մեղադրում են, որ առանց իրավասություն ունենալու ՀՀ հավաքականի գլխավոր մարզիչ է նշանակել: ՀՀ վարչապետի խորհրդական Մեսրոպ Առաքելյանը Ֆեյսբուքում գրեց, թե գլխավոր մարզչի նշանակման իրավասությունը բացառապես գործկոմինն է, ապա առողջապահության նախարար Արսեն Թորոսյանը Ֆեյսբուքում հայտարարեց. «ՀՖՖ նախագահի նման վարքագիծն անընդունելի է եւ պետք է համապատասխան վերաբերմունքի արժանանա ՀՖՖ գործկոմի ու ընդհանուր ֆուտբոլային հանրույթի կողմից»: Ըստ նրա, Հայաստանի ազգային հավաքականի գլխավոր մարզիչի նշանակումը առանց գործադիր կոմիտեի ուժ չունի եւ առոչինչ է»։ Արսեն Թորոսյանն, ի դեպ, ՀՖՖ գործկոմի նիստին չի մասնակցել։

Հարցին, թե քաղաքական դրդապատճառներ տեսնում է՞՝ Վանեցյանը պատասխանեց.«Քաղաքական դրդապատճառ չեմ տեսնում , տեսնում եմ հետաքրքրություն ինչ-որ թեմայի շուրջ աղմուկ բարձրացնելու»։ Թե ինչու է աղմուկն իր անձի շուրջ Վանեցյանն արձագանքեց՝ ես այդ հարցին չպատասխանի, ինքներդ պատասխանեք։

Արթուր Վանեցյանը շեշտեց՝ որեւէ ոտնձգություն հայկական ֆուտբոլի նկատմամբ անթույլատրելի է. «Եկեք բոլորս միավորվենք եւ փորձենք ունենալ լավ ֆուտբոլ»։

ԱԱԾ նախկին տնօրենի պաշտոնից հեռանալուց հետո, Վանեցյանի խոսքով, ինքը աշխատում է հանրային հայտարարություններ չանել, մասնակցություն չունենալ որեւէ իրադարձության, բայց իր ցանկացած գործողությունը՝ երկրից բացակայելուց մինչեւ սրճարան գնալը դառնում է քննարկման առարկա։ « Էդ էլ հերիք չի, իմ հրաժարականից հետո որոշ լրատվամիջոցներ գրեթե ամենօրյա ռեժիմով կեղծ լուրեր են տարածում իմ մասին։ Այդ լուրերից որեւէ մեկը չի հաստատվել, ես, իհարկե, կարող եմ հանդես գալ հերքումներով, բայց չեմ ուզում հանդես գալ հերքումներով կամ ներկայացնել դատական հայցերով, որպեսզի հանգստանան ու շարժվեն առաջ։ Բոլոր տեղեկությունները, որ տարածում են իմ մասին եւ փորձում են սեւացնել ինձ, իրականության հետ որեւէ կապ չունեն»,-եզրափակեց Վանեցյանը՝ հորդորելով լրագրողներին հավատալ հայկական ֆուտբոլի լավ ապագային։

Հիշեցնենք, իշխանություններ-Վանեցյան հարաբերություններում բեկում տեղի ունեցավ այն բանից հետո, երբ ԱԱԾ նախկին տնօրեն Արթուր Վանեցյանը հրաժարական ներկայացրեց՝ սուր քննադատության ենթարկելով վարչապետ Փաշինյանին եւ նրան «կան առ»-ի սթափեցնող կոչ անելով։

Աղբյուր` Փաստինֆո