Փաստ ինֆո

ՊՊԾ գնդի գրավման ընթացքում ոստիկանները վիրավորվել են փողոցում։ Այս մասին Երևանի ընդհանուր իրավասության դատարանում ընթացող այսօրվա դատական նիստում հայտարարել է «Սասնա Ծռեր-1» գործով ամբաստանյալ Վարուժան Ավետիսյանը՝ պատասխանելով մեղադրող դատախազի հարցերին։ Վարուժան Ավետիսյանը պնդեց, թե ոստիկանները վիրավորում են ստացել փոխհրաձգության ժամանակ, փողոցի տարածքից, այլ ոչ՝ ՊՊԾ գնդի տարածքից։

Հիշեցնենք, որ «Սասնա Ծռերի» անդամները 2016 թ. հուլիսի 17-ին զինված գրավել են Ոստիկանության ՊՊԾ գունդը, որի ժամանակ զոհվել են գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։

Սպանությունների համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Անդրադառնալով Տեփանոսյանի սպանությանը՝ Ավետիսյանը նշեց, որ իրենց կողմից կրակոց չի եղել և այդ գործի մասին շատ տեղեկություն ունի Արթուր Վանեցյանը, քանի որ մայորը, ում հետ խոսել են իրենք, եղել է Վանեցյանը։
Ինչը վերաբերում է գերեվարված ոստիկաններին ազատ արձակելու համար դրված պայմաններին՝ Ավետիսյանը նշեց, որ դրված պայմանից ելնելով չեն ազատել ոստիկաններին, այլ՝ սեփական կամքով և ոստիկանների անվտանգությունից ելնելով։

Ցուցմունքում Ավետիսյանը նշեց, որ Գագիկ Մկրտչյանի վիրավորում ստանալու պահին Արմեն Բիլյանը և Էդվարդ Գրիգորյանը ներկա չեն եղել։
«Հրահանգ է եղել՝ չկրակել մարդկանց ուղղությամբ»,- ասաց Ավետիսյանը՝ հավելելով, որ դա չէր վերաբերում ինքնապաշտպանությանը։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։

ՊՊԾ գունդը զավթելու եւ նշված այլ արարքները կատարելու մեջ մեղադրվում է 32 անձ: Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատամարտիկ Արայիկ Խանդոյանը, ով հայտնի է որպես «Միայնակ Գայլ», մահացել է։

«Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ 11 ամբաստանյալի մասով, մնացել է Արտուշ Գաբրիելյանի վարույթում։

Հեղինակ՝ Իզաբել Սահակյան

Աղբյուր` Փաստինֆո