Փաստ ինֆո

Այս պահին ԵՊՀ բանասիրական ֆակուլտետի ուսանողները դասադուլ են իրականացնում։ «Փաստինֆո»-ի թղթակցի փոխանցմամբ ուսանողները նշում են, որ բուհական ծրագրում «Հայոց լեզու», «Հայ գրականություն» և «Հայոց պատմություն» առարկաները ոչ պարտադիր դարձնելը ճիշտ որոշում չէ։

ԵՊՀ հայ գրականության ամբիոնի դասախոս Արշալույս Գալստյանը նշեց, որ սա ուսանողական ինքնաբուխ ակցիա է, սակայն վերջինիս կարծիքով ուսանողներն այս դեպքում ճիշտ են. «Խնդիրը նախ պետք է հասարակական լայն քննարկման փուլ անցնի և հասկանանք՝ ինչու են այս առարկաները հանվում։ Այսինքն պարտադիր բաղադրիչն ինչու՞ է հանվում, արդյոք չե՞նք վնասում ազգային ինքնությանը։ Եթե քննարկումները հասնեն նրան, որ հասկանանք՝ որևէ վնաս չի հասցնում, խնդրեմ եկեք հանենք և փոխենք մասնագիտական շատ առարկաներով, բայց եթե դա ազգային բաղադրիչին, ինքնությանն իսկապես վտանգ է սպառնում, այդ դեպքում տեղին է այս բողոքը»,-ասաց դասախոսը։

Վերջինիս համոզմամբ եթե բովանդակային մասով խնդիր կա, ապա պետք է վերանայվի բովանդակությունը և ծրագրային փոփոխություններ կատարվեն. «Չպետք է համեմատություն անել արտասահմանյան և ամերիկյան բուհերի հետ։ Ծանոթ եմ այդ բուհերին, բայց եկեք հասկանանք, որ նրանք ազգային ինքնության պահպանության խնդիր երբեք չեն ունեցել։ Սա պարզապես վտանգում է մեր ազգային ինքնությունը։ Կառավարությունը պետք է հստակ դիրքորոշում որդեգրի, որ քաղաքականությունն ուղղի մեր ազգային, մշակութային արժեքները, լեզուն պահպանելուն և ոչ թե տուրք տալ մոդայիկ ձևակերպումներին»,-ասաց Արշալույս Գալստյանը։

Հարցին՝ արդյոք խնդիրը ԿԳՄՍ նախարար Արայիկ Հարությունյանի հրաժարականով կլուծվի, դասախոսն այդ կարծիքին չէ. «Կարծում եմ՝ նախարարի անձն այստեղ այդքան էլ էական չէ։ Այստեղ էական է կառավարության դիրքորոշումը։ Եթե այս նախարարը պետք է հրաժարական տա, փոխարենը գա մեկ ուրիշը, որը շարունակի նույն քաղաքական գիծը, էական ոչ մի տարբերություն չեմ տեսնում։ Վստահ եմ՝ պարոն Փաշինյանն ականջալուր կլինի և հստակ կհայտնի իր դիրքորոշումը»,-հավելեց Արշալույս Գալստյանը։

Հիշեցնենք, որ ԿԳՄՍ նախարար Արայիկ Հարությունյանը ասել էր, որ աշակերտները 12-ամյա կրթության ընթացքում բավարար գիտելիքներ են ստանում հայոց լեղու, հայ գրականություն և հայոց պատմություն առարկաներից և ըստ էության համալսարանական  ծրագրի մեծ մասում դրանց ներառումն ազդում է նրանց մասնագիտական որակների վրա։

Աղբյուր` Փաստինֆո