Փաստ ինֆո

2016թ. հունիսի 4-ին Նուբարաշենի խճուղում 58-ամյա Եղիշե Խաչատրյանի սպանության գործով դատարանի կողմից սահմանված ապացույցների հետազոտման հաջորդականությունը փոփոխվել է: Հաջորդ՝ նոյեմբերի 11-ին կայանալիք դատական նիստում դատարանը կհետազոտի գործում եղած փաստաթղթերը: 

«Փաստինֆո»-ի թղթակիցը Եղիշե Խաչատրյանի սպանության գործով մեղադրյալի կարգավիճակ ունեցող հանգուցյալ Արարատ Նիկողոսյանի պաշտպան Լիպարիտ Սիմոնյանից տեղեկացավ, որ ապացույցների հաջորդականությունը փոփոխվել է այն պատճառով, որ դատակոչված վկաներից երկուսը գտնվում են արտերկում, այս ընթացքում դատարանը միջոցներ կձեռնարկի վկաներին դատարանում հարցաքննելու ուղղությամբ, իսկ մինչ այդ կհետազոտվեն գրավոր ապացույցները:

Հիշեցնենք, որ մեղադրյալ, 1990թ. ծնված Արարատ Նիկողոսյանը մահացել է «Նուբարաշեն» քրեակատարողական հիմնարկում 2018թ. օգոստոսի 23-ին: Կալանավորին հայտնաբերել են քրեակատարողական հիմնարկի 4-րդ մասնաշենքի խցում, որտեղ նրա հետ միասին պահվել են ևս 8 այլ կալանավոր։ Իսկ համախցակից կալանավորը հայտարարել էր, որ Արարատը գտնվել է խցի սանհանգույցում, ինքն աղմուկ է լսել, ձայն են տվել, իսկ երբ Արարատը չի արձագանքել բացել է դուռը և տեսել, որ նա ընկած է: Արարատ Նիկողոսյանի դիակի դիահերձման արդյունքներով մահվան պատճառ է նշվել թույլ սրտային անբավարարությունը։

Հիշեցնենք, որ ըստ մեղադրանքի՝ Արտաշես Չիչոյանը Խաչիկ Կոսյանի, Արարատ Նիկողոսյանի, Յուրի Հակոբյանի, Արթուր Զաքարյանի և ինքնությունը չպարզված անձի հետ խուլիգանական դրդումներով Եղիշե Խաչատրյանին կյանքից զրկելու միասնական դիտավորությամբ, գիտակցելով մեկը մյուսի գործողությունները և մեկը մյուսի գործողությունները լրացնելով, խմբով ձեռքերով և ոտքերով անկանոն հարվածներ են հասցրել Եղիշե Խաչատրյանի կենսական նշանակություն ունեցող օրգանի` գլխի, ինչպես նաև կրծքավանդակի և որովայնի շրջաններում և պատճառելով կյանքի հետ անհամատեղելի մարմնական վնասվածքներ` ապօրինաբար Ե.Խաչատրյանին դիտավորությամբ զրկել են կյանքից:

Միևնույն ժամանակ, դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով հասարակության նկատմամբ` Ա.Չիչոյանը և մյուսները նույն խմբի կազմում կատարել են խուլիգանություն, որը զուգորդվել է անձի առողջությանը միջին ծանրության վնաս պատճառելով: ԴԱՀԿ ծառայության աշխատակից Խաչիկ Կոսյանին, Արտաշես Չիչոյանին, Արարատ Նիկողոսյանին, Յուրի Հակոբյանին և Արթուր Զաքարյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով և 258-րդ հոդվածի 3-րդ մասի 1, 4 կետերով:

Աղբյուր` Փաստինֆո