Փաստ ինֆո

Մենք՝ «Ավագ սերնդի միավորում» հասարակական կազմակերպության անդամներս ուրախությամբ հետեւում ենք կառավարության անզիջում պայքարին մեր երկրում առկա կոռուպցիայի դեմ եւ աջակցում ենք այդ պայքարին։ Մենք նաեւ գոհունակությամբ տեսնում ենք, թե ոնց են հետզհետե պատասխանատվության ենթարկվում մեզնից շատերին եւ հարյուր հազարավոր մեր այլ համաքաղաքացիների աղքատության շեմին հասցրած նախկին ռեժիմները ներկայացնող թալանչիները, սակայն կարծում ենք, որ այդ գործընթացը, այդ թվում՝ գողունի վերադարձը ընթանում է ոչ պատշաճ տեմպով։

Մենք նաեւ որպես նոր իշխանությունների կողմից մեր խնդիրների հանդեպ ուշադրության նշան ենք գնահատում 2019թ․ սկզբից նվազագույն կենսաթոշակի բարձրացումը 16000 –ից 25000 դրամի, իսկ 2020թ․ հունվարից կենսաթոշակները 10 տոկոսով բարձրացնելու մասին որոշումը։ Սակայն մենք արձանագրում ենք, որ այդ չնչին հավելումը գրեթե որեւէ կերպ չի բարելավում մեր կենսամակարդակը եւ չի հասցնում կենսաթոշակների չափը կենսաապահովման նվազագույն զամբյուղի արժեքին, որն ըստ ՀՀ ներկա սոցիալ-տնտեսկան պայմանների կազմում է շուրջ 110.000 ՀՀ դրամ։ Դա նշանակում է, որ այս հավելումից հետո էլ թոշակառուները չեն կարող ինքնուրույն հոգալ սեփական տարրական կենսապահովումը։

Մենք տարիքի բերմամբ բազմաթիվ խնդիրներ ունենք՝ առողջական եւ վերականգնողական, սոցիալական, տնտեսական եւ մշակութային։ Մենք 40 եւ ավելի տարիներ աշխատել ենք՝ զարգացնելով երկրի տնտեսությունը ու ստանալով ոչ բարձր աշխատավարձ, սակայն իմանալով, որ գոնե մեր ծերությունը ապահով եւ արժանապատիվ պայմաններում ենք անցկացնելու։ Սակայն այժմ մնացել ենք մեր զավակների ֆինանսական օգնության հույսին, մինչդեռ նրանք էլ միշտ չէ, որ բավարար եւ իրենց աշխատանքին համարժեք են վարձատրվում։ Իսկ այն տարեցները, ովքեր չունեն զավակներ, կամ անտեսված են նրանց կողմից՝ ապրում են ծայրահեղ վատ պայմաններում։ Մենք ձեր ուշադրությունն ենք հրավիրում այն փաստի վրա, որ խոշոր բիզնեսը կայացել եւ բարգավաճել է հիմնականում մեր աշխատանքով ստեղծված ենթակառույցները եւ արդյունաբերական ներուժը շահագործելու շնորհիվ։ 

Գիտակցելով, որ կենսաթոշակառուների մեծ թիվը (շուրջ 570.000) հնարավորություն չի տալիս միանգամից բարձրացնել բոլորի թոշակները մինչեւ նվազագույն կենսապահովման շեմը, մենք կոչ ենք անում, որպեսզի ընդունվի կենսաթոշակների բարձրացման ազգային ժամանակացույց, որով առաջիկա 5 տարվա ընթացքում նվազագույն կենսաթոշակը կհասցվի նվազագույն կենսապահովման շեմին։ Իսկ արդեն 2020թ․-ի համար մեր կենսաթոշակները պահանջում ենք ավելացվել ոչ թե 10 այլ, առնվազն 30 տոկոսով, ինչը կարժենա բյուջեին 25-ի փոխարեն շուրջ 75 մլրդ դրամ, ինչը, մեր կարծիքով, խելամիտ գումար է, որը կառավարությունը ի վիճակի է հայթայթել, այդ թվում՝ վերականգնելով մեզնից՝ ժողովրդից նախկին իշխանությունների կողմից գողացված գումարները, ինչպես նաեւ կիրառելով պրոգրեսիվ հարկ խոշոր բիզնեսի վրա։   

--------------------------------------------------------------------------------------------------------------------------------------------------------------------

«Ավագ սերնդի միավորում» հասարակական կազմակերպությունը հիմնադրվել է 2015թ․-ին ավագ սերնդի ներկայացուցիչների եւ նրանց աջակցող երիտասարդների կողմից։ 2016թ․-ից Եվրոպայի ժողովրդական կուսակցության (European People’s Party - EPP) աֆիլացված անդամ Եվրոպայի ավագների միության (European Seniors Union - ESU) դիտորդ անդամ է։ Հանդես է գալիս ժողովրդավարության եւ մարդու իրավունքների հետեւողական պաշտպանությամբ, տարեց մարդկանց իրավունքների պաշտպանությամբ, Հայաստանի հասարակական, մշակութային, քաղաքական եւ տնտեսական կյանքում նրանց ինտեգրման հարցերով։

Նամակին կցված է մասնակից 115 մարդու անուն ազգանուններով, ծննդյան տարեթվերով և մասնագիտություններով ցուցակը.

«Ավագ սերնդի միավորում» հասարակական կազմակերպության անդամներ, Հնաբնակ երեւանցիների ասոցիացիայի անդամներ, այլ միացած կազմակերպություններ եւ քաղաքացիներ՝

 Բաց նամակը բաց է միանալու համար։

Աղբյուր` Փաստինֆո