Փաստ ինֆո

Մենք նորից սխալ խնդիր ենք լուծում, որովհետև Հայաստանի կրթության հարցն այս պահին ամենևին այն չէ՝ հայոց լեզվի ու պատմության դասավանդումն օրենքով է որոշվելու, թե բուհի գիտխորհուրդը։ «Փաստինֆո»-ի հետ զրույցում այս կարծիքն արտահայտեց կրթության փորձագետ Սերոբ Խաչատրյանը։ Նա ընդգծեց, որ կրկին սխալ տեղից ենք սկսում հարցերի քննարկումը, ներկայացումը և նույնիսկ եթե այդ հարցերը լուծվեն մեզ համար ամենալավ տարբերակով, փորձագետի կարծիքով ոչինչ չի փոխվելու։

«Այս 1.5 տարվա ընթացքում կրթական համայնքի ուշադրությունը պետք է սևեռվեր կրթության գլխավոր հարցերի վրա։ Տեսնում ենք, որ կրթությունն արժեզրկված է, արհամարհված է և պարզ չէ, թե ինչ տեսակի կրթություն ենք ուզում։ Մինչև այս հարցերը չհստակեցվեն, անիմաստ է մյուս հարցերը քննարկել և իզուր տեղը կրքեր բորբոքել»,-ասաց Սերոբ Խաչատրյանը։

Նրա կարծիքով` նախարարությունն այս հարցերն անտեսել է և բարձրագույն կրթության և գիտության մասին օրենքի նոր նախագիծը բուհեր ուղարկելուց առաջ կարելի էր մարդկանց հավաքել և ներկայացնել իրենց նպատակներն ու խնդիրները. «Երբ դու թուղթ ես ուղարկում, բայց այդ թղթի հետ մարդ չկա, որը ներկայացնում է, բացատրում է, ապա բնական է, որ ամեն մարդ իրեն հետաքրքրող հարցն է նայում։ Այս դեպքում օրինակ հայոց լեզվի, գրականության և պատմության մասնագետները նայում, տեսնում են չկա կետը, որ այդ առարկաների ուսուցումն օրենքով երաշխավորվում է, և բռնում այդ կետը դնում են որպես գլխավոր հարց»,-նշեց փորձագետը։

Նրա համոզմամբ այսկերպ գնում ենք սխալ ուղղությամբ։ Սկսվում են փոխադարձ մեղադրանքներ, որի վերջում կրթության ոլորտում ոչինչ չի փոխվում. «Այս մակարդակի քննարկումներից բոլորս պարտված ենք դուրս գալու։ Ուզում եմ նախարարությանը խնդրել, որ օրակարգ բերի հարցը, խոսեն մարդկանց հետ, աշխատեն, ուսումնասիրեն։ Ուսումնասիրվի հայոց լեզվի և գրականության դասավանդումը բուհերում և տեսնենք՝ ինչ վիճակ է, ինչ է կատարվում, որից հետո նոր լուծումներ տանք»,-ասաց փորձագետը։

Դիտարկմանն արդյո՞ք գտնում է՝ պետք է երկու կողմերի միջև երկխոսություն լինի, Սերոբ Խաչատրյանը նկատեց, որ այդ երկխոսության առաջին հարցն ամենևին էլ առարկաների հարցը չէ, դա հետո պետք է քննարկվի. «Այս պահին եկեք հասկանանք՝ ինչ ենք ուզում կրթության ոլորտում անել և որն է նախարարության օրակարգը»,-հավելեց փորձագետը՝ նկատելով, որ նախարարությունն այս փուլում անընդհատ պաշտպանվում է, ինչը լավ չէ։

«Երբ նախարարությունն ասում է՝ չէ, մենք հայոց եկեղեցու պատմությունը չենք հանելու, չէ, մենք ընդամենը օրենքն ենք փոխում, չենք հանում հայոց լեզուն կամ չէ սա դեռ նախագիծ չէ, սա ընդամենը աշխատանքային տարբերակ է։ Բայց եթե բոլոր դասախոսների ձեռքին դա կա, էլ ի՞նչ աշխատանքային տարբերակ։ Դա նախագիծ է»,-հավելեց Սերոբ Խաչատրյանը։

Հեղինակ՝ Հասմիկ Կոշկարյան

Աղբյուր` Փաստինֆո