Փաստ ինֆո

«Արցախի էլեկտրոնային գրադարան»-ը նախօրեին ներկայացվել է ազատագրված Քաշաթաղում։ Բերձորի թիվ 1 դպրոցի դահլիճում տեղի է ունեցել Արցախի երիտասարդ գիտնականների և մասնագետների միավորման նախագծի շնորհանդեսը։ 

«Մենք սկսել ենք Արցախի ազատագրված տարածքներից մեկից՝ Քաշաթաղից, նոյեմբեր 8-ին պլանավորում ենք մեկնել մյուս ազատագրված շրջաններ, մասնավորապես, Շահումյանի շրջան։ Նախատեսված է կայքի շնորհանդեսների կազմակերպում ինչպես ԱՀ բոլոր շրջկենտրոններում, այնպես էլ ՀՀ մի շարք բուհերում։ Մեկնարկը տվել ենք Գորիսի պետհամալսարանից»,-«Փաստինֆո»-ին պատմեց Արցախի էլեկտրոնային գրադարան» նախաձեռնող թիմի ղեկավար Ավետիք Հարությունյանը։

Եռալեզու՝ հայերեն, ռուսերեն , անգլերեն կայքը Արցախի վերաբերյալ գիտական ու գեղարվեստական գրականությունը մեկտեղելուց զատ նաեւ օգտակար հարթակ է օտարերկրացիների համար։ Գաղափարը ծնվեց դեռ 2010 թվականին, երբ Ավետիք Հարությունյանն ուսանող էր։ Ասում է՝ այն ժամանակ Արցախի վերաբերյալ նյութերը սակավաթիվ էին։

«Նպատակը հետեւյալն էր, որ Արցախի, ապա նաեւ Հայաստանի վերաբերյալ հնարավորինս շատ տեղեկատվություն ունենանք մեկ հարթակում, որպեսզի տարբեր երկրների տարբեր մասնագետներ այցելեն «Արցախի էլեկտրոնային գրադարան», ծանոթանան իրականության հետ։ Գրադարանից բացի, կայքը ունի նաեւ «Արցախ» բաժինը, որը ներկայացնում է ինչպես ընդհանուր տեղեկություններ Արցախի Հանրապետության մասին, այնպես էլ հակամարտության։ Այդ կերպ նաեւ Արցախը ներկայանալի ենք դարձնում օտարերկրացիների համար»,-պատմեց Ավետիք Հարությունյանը՝ նշելով, որ ծրագրի հանրայնացմանն աջակցում է ՀՀ ԿԳՄՍ նախարարությունը։

Էլեկտրոնային գրադարանը հասանելի է անվճար։ Առաջիկայում կստեղծվեն նաեւ քարոզչական հոլովակներ, կտպագրվեն կայքից ճիշտ օգտվելու ուղեցույց -պաստառներ։ «Թիրախը նաեւ արտաքին լսարանն է։ Կարգախոս ենք ընտել՝ «Արցախի էլեկտրոնային գրադարան». Արցախը՝ ամենուր, որպեսզի վիրտուալ տիրույթում Արցախը ամենուր լինի»։

Աղբյուր` Փաստինֆո