Փաստ ինֆո

Քաղցկեղով հիվանդ Գրիշա Հակոբյանի նկատմամբ որպես խափանման միջոց կալանավորումն ընտրելու մասին որոշումը կբողոքարկվի։ Այս մասին «Փաստինֆո»-ի հետ զրույցում ասաց Գրիշա Հակոբյանի պաշտպան Երվանդ Վարոսյանը։

Նշենք, որ Գրիշա Հակոբյանին մեղադրանք է առաջադրվել՝ դիտավորությամբ առողջությանը ծանր վնաս պատճառելու (ՀՀ քրեական օրենսգրքի 112-րդ հոդվածի 1-ին մասով), փաստաթղթեր (անձնագիր) կեղծելու (ՀՀ քրեական օրենսգրքի 325-րդ հոդվածի 1-ին մասով, 4 դրվագ), ՀՀ պետական սահմանը մի քանի անգամ ապօրինի հատելու համար ( ՀՀ քրեական օրենսգրքի 329-րդ հոդվածի 1-ին մասով, երեք դրվագ): Վերջինս 2016թ.-ից եղել է հետախուզման մեջ, հայտնաբերվել է Գերմանիայում ու ուղարկվել Հայաստան։

Հարազատները վիճարկում են առաջադրված մեղադրանքը, բայց այս փուլում բարձրացնում են նրա առողջական վիճակի հարցը, ինչի կապակցությամբ օրեր առաջ բողոքի ակցիա էին կազմակերպել Արարատի մարզի դատախազության մոտ, ու խոստանում են ակցիաները շարունակել, քանի դեռ չի փոխվել խափանման միջոցի հարցը, քանի որ համոզված են, որ ՔԿՀ-ի պայմաններում հնարավոր չէ ապահովել պատշաճ բուժումը։

Փաստաբանը «Փաստինֆո»-ի հետ զրույցում նշեց, որ իր պաշտպանյալի առողջական վիճակը շատ ծանր է գնահատվում։ Նա քաղցկեղից բացի ունի նաև գլխուղեղի անոթների հետ կապված լուրջ խնդիրներ և զարկերակային ճնշում։

«Ակնհայտ է, որ մեկուսարանային պայմաններում անհնար է, որ ինքը ստանա այն բուժօգնությունը, որը պետք է։ Ինձ համար անհասկանալի էր, որ նրա նկատմամբ կալանքը որպես խափանման միջոց ընտրվեց»,- ասաց Վարոսյանը՝ նշելով, որ այս պահին չի ցանկանում անդրադառնալ գործի փաստական մասին և վստահ է, որ վարույթն իրականացնող մարմինը կհաստատի, որ ծանր մարմնական վնասվածք հասցնելու մեղադրանքն անհիմն է։

Պաշտպանն ընդգծեց, որ Հակոբյանին անազատության մեջ պահելու անհրաժեշտություն բացարձակապես չկա. Վարույթն իրականացնող մարմինը շատ հանգիստ կարող էր նախաքննությունը կատարել առանց Գրիշա Հակոբյանին ազատությունից զրկելու։

Նա հավաստիացրեց, որ Գրիշա Հակոբյանը ոչ թե քննությունից է խուսափել, այլ գտնվել է Գերմանիայում՝ բուժման մեջ, ինչի մասին տեղյակ են եղել նաեւ ՀՀ իշխանությունները։ «Ուղղակի այսքան տարի գործընթաց է տեղի ունեցել Հայաստանի և Գերմանիայի միջև՝ կապված նրա արտահանձնման հետ։ Այդ հիվանդություններն են պատճառը, որ անընդհատ այս խնդիրը ձգձգվել է։ Նախ նա բուժում է ստացել Գերմանիայում, հետո էլ՝ Գերմանիայի իշխանությունները երկար ժամանակ համապատասխան հավաստիքներ են փորձել ստանալ ՀՀ իշխանություններից, որ կարողանան այդ բուժումը շարունակել»,- նշեց Վարոսյանը։

Նրա խոսքով՝ այս պատճառով, որ 2019թ. հունվարին Գրիշա Հակոբյանն անձամբ է Գերմանիայից գրավոր դիմել ՀՀ Գլխավոր դատախազին՝ խնդրելով, որ իր նկատմամբ հետախուզումը վերացվի, որ վերջինս կարողանա հատել սահմանը և վերադառնա Հայաստան։ Ինչ վերաբերում է Գրիշա Հակոբյանի առողջական վիճակի մասին վկայող բժշկական փաստաթղթերին, պաշտպանը նշեց, որ փաստաթղթերից մեկն արդեն ներկայացվել է վարույթն իրականացնող մարմնին, իսկ մյուս մասը՝ թարգմանության փուլում է գտնվում։

Հարցին, թե արդյո՞ք պատրաստվում են բողոքարկել Հակոբյանին կալանավորելու որոշումը, Վարոսյանը պատասխանեց. «Բնականաբար կբողոքարկվի։ Բայց ես, այնուամենայնիվ, հույս ունեմ, որ, հաշվի առնելով նրա առողջական վիճակը, անկախ մեր կողմից ներկայացվող բողոքից, վարույթ իրականացնող մարմինը կամ հսկողություն իրականացնող դատախազը կվերանայեն խափանման միջոցը»։

Պաշտպանը նաև հայտնեց, որ իր ստացած տեղեկությունների համաձայն՝ Գրիշա Հակոբյանի առողջական վիճակը կտրուկ վատացել է ՔԿՀ-ում։

Հեղինակ՝ Իզաբել Սահակյան

Աղբյուր` Փաստինֆո