Փաստ ինֆո

Ինչ-որ փոքր, ոչ էական նշանակություն ունեցող գործերով, ենթադրում եմ, որ դատարանի վրա ինչ-որ ճնշում չի լինում։ Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը։

«Բայց կալանքի կամ մնացածի հետ կապված այն հիմնական գործերով, շատ բիրտ ճնշում է, որը մենք տեսնում ենք իշխանության կողմից, առաջին դեմքերից սկսած։ Այո, Աննա Դանիբեկյանն էր, որ ճանաչել էր առաջին ատյանի խախտումը։ Բայց դա չի ենթադրում, որ գույքի վրայից կալանքը պետք է հանվի, ենթադրում էր զուտ, որ ճանաչվում է իրավունքի խախտումը»,-ասաց Լևոն Քոչարյանը՝ ընդգծելով, որ ինքն, այնուամենայնիվ, վստահություն չունի Աննա Դանիբեկյանի նկատմամբ. «Մարդն ակնհայտ արհամարհեց Սահմանադրական դատարանի որոշումը»,-նշեց Լևոն Քոչարյանը։

Անդրադառնալով մարզերում Ռոբերտ Քոչարյանի աջակիցների սկսած ստորագրահավաքին՝ Լևոն Քոչարյանն ասաց, որ մամուլով է հետևում այդ ամենին և նույնիսկ չի մտածել գնալու և մասնակցելու մասին։ Ինչ վերաբերում է այն լուրին, որ Արցախում Վիտալի Բալասանյանի գլխավորությամբ ստորագրահավաք սկսելուն, Լևոն Քոչարյանն ասաց. «Շատ ուրախ եմ և շնորհակալ եմ Վիտալի Բալասանյանին ՝ Արցախում նման բան նախաձեռնելու համար»,-նշեց Լևոն Քոչարյանը։

Հեղինակ՝ Հասմիկ Կոշկարյան

Աղբյուր` Փաստինֆո