Փաստ ինֆո

«Հայաստանին այնպիսի զինատեսակներ են տրամադրվել, որոնք նախկինում երբեք չեն եղել, այնպես որ կարծում եմ, մեղք է Ռուսաստանից նեղանալը : Հայաստանին նաև վաճառվում է այնպիսի զենք, որն այլ երկրներին չի վաճառվում», - լրագրողների հետ ճեպազրույցում հայտարարել է ՌԴ Պետդումայի՝ ԱՊՀ, եվրասիական ինտեգրացիայի և հայրենակիցների հետ կապերի կոմիտեի ղեկավար Լեոնիդ Կալաշնիկովը՝ անդրադառնալով ՌԴ կողմից Ադրբեջանին զենքի մատակարարման խնդրին։ 

Նա նշել է, որ ՀԱՊԿ խորհրդարանական վեհաժողովի խորհրդի նիստի ժամանակ այս հարցը չի քննարկվել։

«Այս հարցը խորհրդարանական վեհաժողովի իրավասության ներքո չէ։ Կա քարտուղարություն, կան երկրների ղեկավարներ, որոնք , ըստ ամենայնի այդ հարցերը քննարկել ու քննարկում են, բայց ես չեմ կարող այդ մասին որևէ բան ասել: Այս մասին բազմիցս խոսվել է», - ասել է Կալաշնիկովը։

Նա նշել է, որ ՀԱՊԿ-ը ոչ միայն Ադրբեջանին է զենք վաճառում, այլև իր բոլոր գործընկերներին, այդ թվում ՝ Հայաստանի։ Կալաշնիկովը շեշտեց, որ Ռուսաստանը Հայաստանին տրամադրում է այնպիսի զինատեսակներ, որոնք մյուս երկրներին չի տրամադրում։

Դիտարկմանը, թե Հայաստանի վարչապետն անհանգստություն է հայտնել Ռուսաստանի կողմից Ադրբեջանին զենքի վաճառքի հետ կապված, Կալաշնիկովն արձագանքել է. «Իհարկե, անհանգստացնում է, այնպես, ինչպես Ադրբեջանին է անհանգստացնում է այն, որ մենք Հայաստանին նորագույն տեխնիկա ենք վաճառում։ Դրա համար կան երկրների ղեկավարներ, թող այս հարցերով նրանց գլուխները ցավեն»:

Աղբյուր` Փաստինֆո