Փաստ ինֆո

«Այսօրվա նիստերի ընթացքում ենթադրում եմ սահմանի կրակոցների մասին քննարկում կլինի, բայց մի քիչ զարմանալի է, որ դրա մասին անընդհատ պետք է ասենք և նշենք, որ ինչ-որ կողմից, ինչ-որ ձևով արձագանք լինի մի կառույցում, որը հենց միտված է կանխել այդ կրակոցները և՛ ապագայում, և՛ ներկայում»,-այս մասին այսօր լրագրողների հետ ճեպազրույցում ասաց Ազգային ժողովի փոխնախագահ Ալեն Սիմոնյանը։

Հարցին, Հայաստանը պաշտոնապես դիմե՞լ է ՀԱՊԿ-ին կրակոցների հետ կապված՝ Սիմոնյանը պատասխանեց. «Ես չեմ դիմել, պետությունը դիմել է թե ոչ՝ չգիտեմ, նման տեղեկություն չունեմ, գուցե դիմել է»։

Նա նշեց, որ կրակոցների թեման մշտապես կարևոր է և դրա հետ կապված խոսակցություններ միշտ էլ եղել են։

«Նիստն ունենում է իր օրակարգը, իսկ օրակարգից դուրս հարց բարձրացնելը ենթադրում եմ արդեն ճիշտ չի լինի, կբարձրացնենք այն ժամանակ, երբ կլինի օրակարգում։ Երբ համապատասխան գերատեսչությունները կորոշեն, որ այդ հարցը մտցվի օրակարգ, ես մեծ հաճույքով այն կբարձրաձայնեմ, եթե ինձ վերագրված լինի և կպաշտպանեմ մեր դիրքորոշումը»,-ասաց ԱԺ փոխնախագահը։

Սիմոնյանի խոսքով, թե՛ Զատուլինի հետ և թե՛ մի շարք այլ բարձրաստիճան պաշտոնյաների հետ առաջին հանդիպման ժամանակ բարձրացվել է ՀԱՊԿ անդամ երկրների կողմից Ադրբեջանին զենքի մատակարարման հարցը։

«Խնդիրը մինչ օրս չի լուծվում։ Նույնիսկ վարչապետի կողմից է այդ հարցը բարձրացվել, եթե չեմ սխալվում, հրապարակային, իսկ ինչ վերաբերում է իրենց արձագանքին, այն մնում է նույնը»,-ասաց Սիմոնյանը։

Իսկ նման դեպքում ինչպես է հարցի լուծումը պատկերացնում՝ ԱԺ փոխնախագահը պատասխանեց. «Սա խնդիր է, որը պետք է լուծում ստանա։ Մենք պետք է հասկանանք, որ սա ուղղակի անընդունելի է ՀՀ-ի համար և եկեք պատկերացնենք, եթե նման մի բան լիներ հակառակ պարագայում։ Ենթադրենք՝ Հայաստանը զենք վաճառեր որևէ երկրի, որը խնդիրներ ունի, ասենք ,Ռուսաստանի կամ ՀԱՊԿ անդամ այլ երկրի հետ, պատկերացնու՞մ եք՝ ինչ աղմուկ կբարձրանար։ Հիմա արձանագրելով, որ այդ խնդիրը կա և այն մեզ անհանգստացնում է, փորձում ենք լուծումներ գտնել և ոչ թե լոզունգներով հանդես գալ»։

Սիմոնյանն ասաց, որ իրենց հարցին ի պատասխան ասվում է, որ Հայաստանին նույնպես զենք են տրամադրում և դա անում են շատ ավելի նպաստավոր ու լավ պայմաններով։

«Ռուսական կողմն ասում է, որ եթե մենք չվաճառենք ուրիշ մեկը կվաճառի, բայց ներեցեք, ինձ համար դա կոնկրետ հարցի պատասխան չէ»,-նշեց ԱԺ
փոխնախագահը։

Հեղինակ Սոնա Գեւորգյան

Աղբյուր` Փաստինֆո