Փաստ ինֆո

Այսոր երեկոյան ֆեյսբուքյան իր էջում վարչապետ Նիկոլ Փաշինյանն անդրադարձել է  դպրոցական ծրագրից Հայ Եկեղեցու պատմություն առարկան հանելու հարցին:

Նա մասնավորապես ասել է.

«Վերջերս շատ հաճախ քննարկվում է այն հարցը, թե ինչո՞ւ է ՀՀ  ԿԳՄՍ նախարարությունում քննարկման առարկա դարձել Հայ Եկեղեցու պատմության դասավանդումը որպես առանձին առարկա: Հիմա մեր դպրոցներում դասավանդվում է Հայ Ժողովրդի պատմություն և Հայ Եկեղեցու պատմություն առարկաները: Ի՞նչ է սա նշանակում: Արդյո՞ք սա նշանակում է, որ այդ երկուսն իրարից տարանջատ ինչ-որ երևույթներ են: Եվ արդյոք մենք դրանք տարանջատ դասավանդելով  վիզուալ և հոգեբանական պատկեր չենք ստեղծում, որ, այնուամենայնիվ, Հայ ժողովրդի և Հայ եկեղեցու միջև կա որոշակի անջրպետ… Նույն տրամաբանությամբ՝ տարանջատելով Հայ ժողովրդի պատմությունից, արդյո՞ք պետք է մտցնել պետականության, օրենքների, զինված ուժերի, գիտության, մշակույթի պատմության առարկաներ…Հայ ժողովրդի պատմությունը բաղկացած է հայ եկեղեցու, գիտության, մշակույթի պատմությունից և այլն»

ՀՀ վարչապետը հավելել է, որ տեխնոլոգիական երկիր դառնալու հավակնությամբ,  պետք է ճշգրիտ ձևակերպել, թե դպրոցում երեխաներին ինչ առարկաներով ենք ծանրաբեռնում: Ըստ նրա՝ դա հնարավոր է, եթե հատուկ ուշադրություն դարձվի ֆիզիկայի, քիմիայի, մաթեմատիկայի և երկրաչափության վրա:

Նիկոլ Փաշինյանը նշել է, որ Հայաստանը պետք է լինի ժամանակակից երկիր, որտեղ հարգվում է մարդու մտածելու իրավունքը. «Բոլորը պարտավոր չեն միանման մտածել տարբեր հարցերի հետ կապված, այդ թվում, քաղաքական: Հակառակ դեպքում մեր երկիրը հետ ենք գլորում: Հեղափոխությունը բերել է ազատություն, սակայն կան ուժեր, որ փորձում են դա օգտագործել ու ՀՀ-ում սակավագիտություն հաստատել: Հիմա նոր թրենդ է կարծես, ստանդարտից դուրս ստեղծագործական աշխատանքին կպցնում են սատանիստներ անունը: Ո՞ւր ենք գնում այս ճանապարհով: Հայաստանում միտքը պիտի աշխատի և չպետք է այն լինի կաղապարված»,- ավելացրել է վարչապետը:

Մանրամասները՝ տեսանյութում:

Աղբյուր` Փաստինֆո