Փաստ ինֆո

Ցավում եմ, որ այդ երևույթի քննարկումները գեղագիտական դաշտից տեղափոխվել են լրիվ մեկ ուրիշ վայր, որը բացարձակապես որևէ կապ չունի ո՛չ մշակույթի, ո՛չ էլ առավել ևս նրա հետ, ինչ ցուցադրվեց։ «Փաստինֆո»-ի հետ զրույցում այս մասին ասաց Հովհաննես Թումանյանի անվան տիկնիկային թատրոնի տնօրեն Ռուբեն Բաբայանը՝ անդրադառնալով շաբաթ օրը Հանրապետության հրապարակի մետրոյի կայարանի շատրվանների մոտ տեղի ունեցած «ՀուԶանք ուԶանգ» ներկայացմանը:

Ռուբեն Բաբայանն անձամբ ներկայացումը չի տեսել, սակայն կարծում էայն ոչ այնքան ներկայացում էր, որքան պերֆեկցիոնիստի որոշակի ակցիա, որը շատ տարածված է խոշոր քաղաքներում, երբ փորձում են համապատասխան միջավայրում իրականացնել որոշակի պլաստիկ, դրամատիկ երաժշտական ակցիա՝ ներգրավելով նաև անցորդներին։

«Որքան քննարկումը հեռանում է մշակութային, գեղագիտության պրոբլեմից, այնքան ավելի շատ է խճճվում, այնքան ավելի շատ է թշնամանք առաջացնում։ Որքանով ինքս եմ դատել և զրուցել մարդկանց հետ, որոնց կարծիքը ես հարգում եմ, այն որպես մշակութային ակցիա կարգին հում էր և կարգին սիրողական։ Սակայն դա ոչինչ չի նշանակում, որովհետև եթե մենք այդ տեսակետից սկսենք դատել այն, ինչ կատարվում է Հայաստանում, ուրեմն մեր մշակութային ստեղծագործությունների մոտ 90 տոկոսը պետք է դատապարտենք»,-ասաց Ռուբեն Բաբայանը՝ ընդգծելով, որ մշակութային երևույթը պետք է քննարկել միայն և միայն մշակությի գործին տեղյակ մարդիկ։ Ռուբեն Բաբայանը պնդում է՝ պետք չէ վիրավորել մարդկանց, պետք չէ խոսել բարոյականությունից և օգտագործել անբարոյական մեթոդներ. «Վերջիվերջո մեր առջև փոքր աղջիկներ էին։ Չի կարելի խոսել հայ ընտանիքից, հայ ավանդական մոտեցումներից և վիրավորել կնոջը, աղջկան, հազարումի անուն կպցնել։ Չի կարելի խոսել քրիստոնեությունից և լինել ագրեսիվ։ Այդպիսին քրիստոնեությունը եղել է միջնադարում։ Չեմ կարծում, որ ուզում ենք վերադառնալ միջնադար»,-նշեց ՀՀ արվեստի վաստակավոր գործիչը։

Նրա համոզմամբ ներկայացման մասնակիցներն ավելի շատ բան կշահեին, եթե լիներ հանգիստ, մասնագիտական քննարկում. «Այնտեղ մասնագիտական տեսակետից հաստատ կային մեծ բացեր, կային նաև ինչ-որ ձեռքբերումներ և ինչ-որ գաղափար։ Պետք էր փորձել խոսել, թե այդ գաղափարներն ինչքանով են իրականացվել, ինչքանով են դրանք հետաքրքիր այսօրվա մարդուն, այսօրվա ժամանակներին։ Մենք դրա վրա խաչ քաշեցինք։ Խոսակցությունը տեղափոխեցինք ուրիշ դաշտ։ Սա շատ վատ է»,-հավելեց Ռուբեն Բաբայանը։

Վերջինս նկատեց, որ մարդիկ ուզում են ապրել ազատ և հանգիստ։ Նրանք կարիք չունեն ամեն րոպե կռվի մեջ մտնելու և հաստատելու իրենց այդ իրավունքը. «Նրանք կտեղափոխվեն այնտեղ, որտեղ հանգիստ կարելի է ապրել, զբաղվել սիրած գործով։ Հանգիստ կարելի է հաճախել այնտեղ, որտեղ ուզում ես, այցելել թանգարաններ, պատկերասրահներ՝ առանց վախենալու, որ քեզ կմեղադրեն սատանիզմը խրախուսելու մեջ»,-հավելեց Ռուբեն Բաբայանը։

Մանրամասները՝ տեսանյութում

Աղբյուր` Փաստինֆո