Փաստ ինֆո

Եթե ընտանիքում կա բռնություն, մեր օրենսդրությունը բավարար է։ Մեզ այլևս պետք չէ որևէ այլ նորմատիվ ակտ, որ կարողանանք արդյունավետ պահյքար մղել ընտանեկան բռնության դեմ։ Այս մասին լրագրողների հետ զրույցում ասաց «Բարգավաճ Հայաստան» խմբակցության պատգամավոր Գևորգ Պետրոսյանը։

«Այս կոնվենցիայի վավերացման նպատակը ոչ թե ընտանիքում բռնության կանխարգելումն է, այլ այդ անվան տակ այլ բարքեր Հայաստան ներմուծելը, որին «Բարգավաճ Հայաստան»-ը կտրականապես դեմ է»,-ասաց պատգամավորը։

Նա ընդգծեց, որ բոլորս մեծացել ենք ավանդական ընտանիքներում և պարտավոր ենք մեր սերունդներին ժառանգել նման ընտանիք. «Ես լիահույս եմ, որ ամբողջ խմբակցությունն այս կարծիքը կկիսի։ Պարոն Ծառուկյանը որպես ավանդական ընտանիքի ղեկավար, միշտ էլ կանգնած է եղել ավանդական ընտանիքները պահպանելու կողքին։ Նա կոնվենցիային դեմ է արտահայտվել, որովհետև ինքն էլ է այն կարծիքին, որ դրանով փորձ է արվում մեր իրականություն ներմուծել այնպիսի արժեքներ, որոնք հարիր չեն մեր արժեհամակարգին և ազգային մտածողությանը։ Չեմ կարծում, որ այսքանից հետո որևէ մեկը մեր խմբակցությունում կշեղվի»,-ասաց Գևորգ Պետրոսյանը։

«Փաստինֆո»-ի թղթակցի հաղորդմամբ այժմ Ազգային ժողովի բակում բողոքի ակցիա են իրականացնում՝ ընդդեմ Ստամբուլյան կոնվենցիայի վավերացմանը։

Հավելենք, որ այսօր Ստամբուլյան կոնվենցիան քննարկվելու է ԱԺ պետաիրավական հարցերի, արտաքին հարաբերությունների և մարդու իրավունքների պաշտպանության և հանրային հարցերի մշտական հանձնաժողովների համատեղ նիստում, որին մասնակցելու են նաև Եվրոպայի խորհրդի մարդու իրավունքների գրասենյակի ներկայացուցիչները։

Աղբյուր` Փաստինֆո