Փաստ ինֆո

Եթե դատարանը որոշի, որ Լևոն Երանոսյանը մեղավոր է, կպատժվի։ Ես դրա մեջ կասկած չունեմ։ Այս մասին լրագրողների հետ զրույցում ասաց ԱԺ փոխխոսնակ Ալեն Սիմոնյանը՝ անդրադառնալով պաշտոնեական լիազորությունները չարաշահելու մեջ մեղադրվող Երևանի նախկին փոխոստիկանապետ Լևոն Երանոսյանի գործին։

«Մեղավոր է, թե մեղավոր չի, իրավունք չունեմ նման հայտարարություն անել, որովհետև անմեղության կանխավարկած գոյություն ունի։ Դատական քննությունը կընթանա, կտեսնենք»,-ասաց ԱԺ փոխխոսնակը։

Նա նշեց, որ որպես տուժող նյութական որևէ պահանջ չունի. «Իմ միակ պահանջն այն է, որ այդ նռնակներն այլևս չկիրառվեն, որովհետև դրանց պատճառով այդ օրը Բաղրամյանում բազմաթիվ մարդիկ տուժեցին։ Իմ ոտքի մեջ երեք բեկոր է եղել, բայց ունենք աղջիկ, որի դեմքն է վնասվել, տղա, որի ոտքի հետ կապված մինչ օրս խնդիրներ կան»,-ասաց Ալեն Սիմոնյանը՝ ընդգծելով, որ նման բաներ ՀՀ-ում այլևս չպետք է կիրառվեն։

Վերհիշելով այդ օրը՝ ԱԺ փոխխոնակն ասաց, որ փորձել է վահանը քցել փշալարերի վրա, որպեսզի կարողանա անցնել. «Ոստիկաններից մեկը ջանասիրաբար փորձեց հարվածել մատներից, հասցրեցի ձեռքս հետ քաշել, իսկ դրանից մեկ վայրկյան անց տեղի ունեցավ պայթյունը»,-հավելեց Ալեն Սիմոնյանը։

Նշենք, որ խոսքը գնում է 2018 թվականի ապրիլի 16-ին և 22-ին՝ Երևանում անցկացված բողոքի զանգվածային ակցիաների մասին, որի ժամանակ ցուցարարների նկատմամբ գործադրվել են 8 հատ «Զարյա» տեսակի լուսաձայնային նռնակներ, ինչի հետևանքով 2 տասնյակից ավելի անձանց առողջությանը պատճառվել է տարբեր աստիճանի, այդ թվում՝ ծանր և միջին ծանրությա վնաս։ Այս դեպքի առթիվ հարուցված քրեական գործի շրջանակներում որպես տուժող է ճանաչվել նաև ԱԺ փոխխոսնակ Ալեն Սիմոնյանը։

Հեղինակ՝ Հասմիկ Կոշկարյան

Աղբյուր` Փաստինֆո