Փաստ ինֆո

Երևանի կենդանաբանական այգու տնօրեն Ռուբեն Խաչատրյանը քիչ առաջ ֆեյսբուքյան իր էջում հայտարարեց իր լիազորությունները դադարեցնելու որոշման մասին։

«Հարգելի՛ գործընկերներ, ընկերներ, բարեկամներ,
Երևանի կենդանաբանական այգու շուրջ վերջին օրերի իրադարձությունները, չհանգստացող կրքերն ու թափառող շների հարձակումները այգում պահվող կենդանիների վրա հաշվի առնելով, չբացառելով դրանում առկա մարդկային գործոնը, սակյան չխախտելով նաև անմեղության կանխավարկածը, որոշում եմ կայացրել դադարեցնել Երևանի կենդանաբանական այգու տնօրենի լիազորությունները»,-գրել է տնօրենը։

Ռուբեն Խաչատրյանը գրել է, որ թեպետ որոշումը կայացրել է Երևանի փոխքաղաքապետ Տիգրան Վիրաբյանի առաջարկով, լիահույս է, որ լիազորությունների դադարեցման արդյունքում այլևս կավարտվի կենդանիների անկումների շարանը (այդ թվում՝ թափառող շների հարձակումները), քանի որ իր  աշխատանքի թիրախում մշտապես ունեցել է կենդանիների բարեկեցությունն ու հանրային անվտանգությունը:

«Պաշտոնապես հայտարարում եմ, որ մշտապես եղել եմ, և շարունակելու եմ լինել Երևանի կենդանաբանական այգու կողքին՝ որպես աջակից, ինչպես նաև քաղաքային իշխանությունների թիմակից և ընկեր՝ մշտապես աջակցելով Այգու բարեկարգման որդեգրած ուղին առաջ տանելու հարցում:
Շնորհակալ եմ քաղաքային իշխանություններին՝ ցուցաբերած վստահության համար, և է՛լ ավելի շնորհակալ իմ թիմին՝ իր աշխատանքային պարտականությունները մշտապես գերակատարելու և Կենդանաբանական այգու թռիչքաձև զարգացման ուղին որդեգրելու համար»,-հավելել է նա։

Հիշեցնենք, որ Երևանի փոխքաղաքապետ Տիգրան Վիրաբյանը ֆեյսբուքյան իր էջում հայտնել էր, որ հաշվի առնելով վերջին շրջանում Երեւանի կենդանաբանական այգու կառավարման հարցերում պարբերական դարձած խնդիրները և վերջին օրերի միջադեպերը, խորհրդակցելով քաղաքապետ Հայկ Մարությանի հետ, Ռուբեն Խաչատրյանին առաջարկել է պաշտոնն ազատելու դիմում գրել։

Աղբյուր` Փաստինֆո