Փաստ ինֆո

Կենդանաբանական այգում հոշոտված կենդանիների դիահերձումը ցույց կտա, թե իսկապե՞ս շներ են եղել, թե՞ Կենդանաբանական այգում այլ կենդանի է փախել և այդ մասին մենք չգիտենք։ Այս մասին «Փաստինֆո»-ի հետ զրույցում ասաց «Էկո-մեդիա» ցանցի համահիմնադիր Նարինե Կիրակոսյանը՝ մեկնաբանելով Կենդանաբանական այգում հոշոտված կենդանիների դեպքը։

Հիշեցնենք, որ Կենդանաբանական այգու ղեկավարությունը երեկ հայտնել էր, որ թափառող շները հարձակվել և կերել են 3 կենգուրու, իսկ այսօր շների ոհմակը 3 մուֆլոն է կերել։

Դիտարկմանը, որ կենգուրուները և մուֆլոնները բավականին խոշոր կենդանիներ են, արդյո՞ք հնարավոր է, որ շների ոհմակները հոշոտեին միանգամից 3 առանձնյակների, Նարինե Կիրակոսյանը պատասխանեց, որ կարևոր է կենդանիների սթրեսակայունության տարբերությունը։ Նա ընդգծեց, որ կենգուրուները սթրեսային կենդանիներ են համարվում և այդ պատճառով երեկոյան պետք է գտնվեն փակ տարածքում, ինչն այս դեպքում չի արվել և դա նույնպես հարցեր է առաջացնում։ Ինչը վերաբերում է հոշոտված կենգուրուների թվաքանակին, ապա Նարինե Կիրակոսյանն այդտեղ ևս խնդիր նկատեց։ Հարկ է նշել, որ կենգուրուների թիվը նախկինում եղել է 5-ը, սակայն, Նարինե Կիրակոսյանի խոսքով, այս պահին եղել է 4-ը, իսկ հոշոտված կենդանիների թիվը եղել է 3-ը և հարց է ծագում, թե որտե՞ղ է 4-րդը։ Անդրադառնալով՝ մուֆլոններին, Կիրակոսյանը նկատեց, որ հոշոտված 3 մուֆլոններից 2-ը արու են եղել, իսկ մուֆլոնների արուները բավականին ուժեղ և խոշոր են։

«Հարց է ծագում՝ այդ ոնց եղավ, որ տարածքում մուֆլոնները չկարողացան փախչել շներից և հոշոտվեցին։ Ինձ համար շատ տարօրինակ է՝ ինչ չափերի շներ են եղել և արդյո՞ք շներ են եղել»,- ասաց Կիրակոսյանը։

Նա հավելեց, որ սա առաջին դեպքը չէ, որ Կենդանաբանական այգում կենդանիների վրա շներ են հարձակվում և նախորդ տարիներին նման դեպքեր եղել են։

«Դա նշանակում է, որ Կենդանաբանական այգու աշխատակազմը՝ իր ղեկավարների հետ միասին, չխրատվելով նախորդ օրվա պատմությունից, թույլ է տվել նույն սխալը»,- ասաց Կիրակոսյանը։

Անդրադառնալով այգու պաշտպանությանը` Նարինե Կիրակոսյանը նշեց, որ տարածքում եղել են տեսանկարահանող սարքեր, հարց է ծագում, թե որտե՞ղ են էլեկտրական հովիվները և ինչու՞ միացված չեն եղել։

«Գումար է հատկացվել Կենդանաբանական այգու ազատավանդակների համար և պետք է տեղադրեին ոչ թե ցանցեր, այլ էլեկտրական հովիվներ և այլ միջոցներ։Նախ սա նշանակում է, որ լավ չեն մտածել և երկրորդը՝ որ այդ գումարները կերել են և այգու ընդհանուր ցանկապատում չեն արել»,- նշեց «Էկո-մեդիա» ցանցի համահիմնադիրը՝ հավելելով, որ այգու տնօրեն Ռուբեն Խաչատրյանն այգում ամբողջ տարածքը ցանցապատելու մասին հայտարարել էր դեռ 2013թ.-ին։

Ինչը վերաբերում է Երևանի կենդանաբանական այգու տնօրեն Ռուբեն Խաչատրյանին, ով արդեն պաշտոնից ազատման դիմում է ներկայացրել` Նարինե Կիրակոսյանը նշեց. «Ռուբեն Խաչատրյանն իր կառավարման տարիների ընթացքում ստեղծել է իր սեփական հիմնադրամը՝ «Վայրի բնության և մշակութային արժեքների պահպանման» հիմնադրամը, որն ինքը «Եվրոպական կենդանաբանական այգիների և ակվարիումների միության» մեջ է գրանցել, բայց բոլորին ասում է, որ Կենդանաբանական այգին է գրանցել, սակայն մեր Կենդանաբանական այգին գրանցված է ԱՊՀ երկրների կենդանաբանական այգիների և ակվարիումների միությունում»։

Նարինե Կիրակոսյանը շեշտեց, որ Ռուբեն Խաչատրյանը կառավարման ընթացքում միանձնյա որոշումներ է կայացրել։

«2015թ.-ին 9 սպիտակագլուխ անգղեր է տեղափոխել Իսրայել։ Իսրայելի հետ մենք ոչ մի դիվանադագիտական հարաբերություն չունենք, բայց ամեն մի թռչունը 10 հատ մեքենա արժե։ Նա մի քանի այլ կենդանիներ ևս տվել է այլ երկրների։ Հենց այս կենգուրուները, որոնք 5 էլ արու էին, ոչ մի բազմացման մասին խոսք գնալ չի կարող»,- ասաց Կիրակոսյանը՝ շեշտելով, որ Խաչատրյանն այգուց իր անձնական հիմնադրամ է տեղափոխել մորուքավոր անգղերի միակ բազմացող զույգին։

«Նա պետք է պատասխանատվություն կրի օրենքի առաջ։ 33 կճղակավոր կենդանի է էֆթանազիայի ենթարկել՝ պատճառաբանելով, որ տուբերկուլյոզով է վարակված, բայց տուբերկուլյուզով վարակման վերաբերյալ փաստաթուղթ միայն մեկ կենդանու դեպքում է եղել։ Եթե հաստատված չէ հաստատված չէ, որ բոլոր 33 կճղակավորները հիվանդ են և նրանց սպանում են, դա արդեն նշանակում է, որ պետք է նրան քրեական պատասխանատվության ենթարկել»,- շեշտեց Կիրակոսյանը։

Ավելի վաղ հայտնել ենք, որ այսօր Երևանի կենդանաբանական այգում շ թափառող շները հոշոտել են 3 մուֆլոների, իսկ երեկ՝ նույն թափառող շները՝ 3 կենգուրուների։

Կենդանաբանական այգու տնօրեն Ռուբեն Խաչատրյանը հայտարարել էր պաշտոնից ինքնակամ ազատման մասին։

Հեղինակ՝ Իզաբել Սահակյան

Աղբյուր` Փաստինֆո