Փաստ ինֆո

Երևանի ընդհանուր իրավասության դատարանում՝դատավոր Հարություն Մանուկյանի նախագահությամբ քննվող ոստիկանության զորքերի նախկին հրամանատար, ոստիկանության գեներալ-լեյտենանտ Լևոն Երանոսյանի գործով դատական նիստը հետաձգվեց։

Դատավոր Հարություն Մանուկյանը նշեց, որ դատական նիստի հետաձգման պատճառն այն է, որ նախագահող դատավորն այսօր հերթապահության ցուցակում է ընդգրկված, այսինքն՝ անհապաղ քննության միջնորդություններ են առկա, ինչպես նաև՝ հաջորդիվ նշանակված են այլ դատական նիստեր և դատարանը գերծանրաբեռնված գրաֆիկով է դատական նիստեր նշանակում։

Լևոն Երանոսյանի գործով հաջորդ դատական նիստը նշանակվել է նոյեմբերի 22-ին, ժամը՝ 12։30-ին։

«Փաստինֆո»-ն ավելի վաղ տեղեկացրել է, որ Լևոն Երանոսյանը մեղադրվում է պաշտոնեական լիազորություններն անցնելու մեջ: Ըստ մեղադրանքի` 2018 թվականի ապրիլի16-ին և 22-ին ՝Երևան քաղաքում անցկացված բողոքի զանգվածային ակցիաների ժամանակ, ցուցարարների նկատմամբ գործադրել է ընդհանուր առմամբ 8 հատ «Զարյա» տեսակի լուսաձայնային նռնակներ, ինչի հետևանքով 2 տասնյակից ավելի անձանց առողջությանը պատճառվել է տարբեր աստիճանի, այդ թվում` ծանր և միջին ծանրության վնաս:

Լևոն Երանոսյանի կողմից հատուկ միջոցների գործադրման հետևանքով Բաղրամյան պողոտայում ծառայություն իրականացնող ՀՀ ոստիկանության զորքերի զինծառայողներից 6 հոգի նույնպես ստացել են մարմնական վնասվածքներ:

Նշենք նաև, որ գործով տուժողներից են նաև ՀՀ վարչապետ Նիկոլ Փաշինյանը և ԱԺ փոխխոսնակ Ալեն Սիմոնյանը։
ՀՀ ոստիկանության ներքին զորքերի նախկին հրամանատարի նկատմամբ խափանման միջոց է ընտրվել ստորագրությունը երկրից չհեռանալու մասին:

Հեղինակ՝ Իզաբել Սահակյան

Աղբյուր` Փաստինֆո