Փաստ ինֆո

Վերաքննիչ քրեական դատարանը՝ նախագահությամբ Վազգեն Ռշտունու, դատավորներ Արշակ Վարդանյանի և Սևակ Համբարձումյանի, մերժել է փաստաբանական գործունեություն իրականացրած Իրինա Մանուկյանի վերաքննիչ բողոքը: Վերջինս նախորդ տարի նոյեմբերի 15-ին՝ Սյունիքի մարզի ընդհանուր իրավասության դատարանի դատավճռով դատապարտվել էր 3 տարի ժամկետով ազատազրկման՝ խոշոր չափերի խարդախության և խոշոր չափերի կաշառք տալուն դրդչության մեղադրանքներով և համաներման կիրառմամբ ազատվել պատժի կրումից, սակայն վերաքննիչ բողոք էր ներկայացրել՝ միջնորդելով կարճել քրեական գործի վարույթը՝ հանցագործության դեպքի բացակայության հիմքով:

Նշենք նաև, որ Սյունիքի մարզի 46-ամյա բնակչուհին ահազանգել էր, թե հանցագործություն կատարելու մեջ մեղադրվող իր որդուն ազատազրկման հետ չկապված պատիժ նշանակելու համար կաշառք տալու պատրվակով փաստաբանը գումար է պահանջել։ Կինը հայտարարել էր, որ 2015թ. հոկտեմբեր-նոյեմբեր ամիսներին փաստաբանն իրենից պահանջել և ստացել է 1.000.000 ՀՀ դրամ գումար՝ դատախազին և դատավորին կաշառք տալու համար, սակայն խարդախությամբ գումարը հափշտակել է:

Ըստ մեղադրանքի՝ Իրինա Մանուկյանը իր պաշտպանյալ կալանավոր Ա.Մկրտչյանին արգելանքից ազատելու և նրա նկատմամբ ազատազրկման հետ չկապված պատիժ նշանակելու համար դատավորին և դատախազին կաշառք տալու պատրվակով, շահադիտական նպատակով, դրդել է իր պաշտպանյալի մորը խոշոր չափերով կաշառք տալուն և նրանից առձեռն ստացել է խոշոր չափերով ընդհանուր առմամբ 1.000.000 ՀՀ դրամը, սակայն չի փոխանցել և հափշտակել է այն, ինչպիսի հանգամանքներով պայմանավորված`Անահիտ Մկրտչյանն իր կամքից անկախ հանգամանքներով չի կարողացել ավարտին հասցնել կաշառք տալու իր հանցավոր մտադրությունը:

Փաստաբան Մանուկյանը նախաքննության և դատաքննության ընթացքում իրեն առաջադրված՝ ՀՀ քրեական օրենսգրքի 178-րդ հոդվածի 2-րդ մասի 2-րդ կետով և ՀՀ քրեական օրենսգրքի 38-34-312-րդ հոդվածի 2-րդ մասով մեղադրանքերում մեղավոր չի ճանաչել: Ըստ նրա հայտարարության՝ երբևէ որևէ պաշտոնատար անձի հետ կոռուպցիոն թեմաներով խոսակցություն, առավել ևս պայմանավորվածություն չի ունեցել: Գործով մեղադրյալ Անահիտ Մկրտչյանն ով փաստաբան Մանուկյանի պաշտպանյալի մայրն է առաջին ատյանում ցուցմունք է տվել հայտնելով, որ համոզված է, որ Իրինան հենց սկզբից էլ խաբել է, ոչ մեկին էլ կաշառք տալու և տղային օգնելու նպատակ չի ունեցել և իրենց գումարը վերցրել է հույս ունենալով, որ կարող է տղային ազատեն և հետո նա ասի, որ գումարը տվել է տղայի գործով զբաղվող մարդկանց: Այժմ էլ թեկուզ ընդունում է, որ իրենց տված մեկ միլիոն դրամը պետք է հետ տա, բայց էլի խաբելով ձգձգում է:

Դատարանն իր իրավական վերլուծություններում նշել է, որ կատարած հանցավոր արարքներից յուրաքանչյուրի համար Իրինա Մանուկյանի նկատմամբ պետք է նշանակվի պատիժ ազատազրկման ձևով: Ինչ վերաբերում է Անահիտ Մկրտչյանին, ապա համաներման կիրառմամբ նրա նկատմամբ քրեական հետապնդումը դադարեցվել էր։

Հեղինակ՝ Էլեն Առաքելյան

Աղբյուր` Փաստինֆո