Փաստ ինֆո

Լարսի անցակետում պահվել են «Սպայկա» ընկերության ոչ միայն պանրով, այլև մրգերով՝ խաղողով և տանձով բեռնված մեքենաները։ Այս մասին այսօր «Փաստինֆո»-ին հայտնեց «Սպայկա» ընկերության Նախագծերի կառավարման բաժնի ղեկավար Կարեն Բաղդասարյանը։

«Քանի որ պանիր ենք ուղարկում՝ Ռուսաստանի բոլոր մաքսային անցակետերում կաթնամթերքը հատուկ ռեժիմով է ստուգվում։ Իրենք իրենց պրոցեդուրաների համաձայն ստուգման մեխանիզմով համապատասխան փաստաթղթեր խնդրեցին և ուղարկեցին լաբորատորիա։ Նույնիսկ իրենք այստեղ ներկայացուցիչ ունեն, որին հրավիրեցինք գործարան, որպեսզի տեսնի այդ կոնկրետ խմբաքանակի արտադրության պրոցեսը»,- ասաց Բաղդասարյանը՝ անդրադառնալով «Սպայկա» ընկերության` պանրով բեռնված 2 մեքենայի Լարսի մաքսային անցակետում պահելուն։

Նա հայտնեց, որ այս պրոցեսը արդեն 2 շաբաթ է, ինչ շարունակվում է և դրա պատճառով «Սպայկա»-ի համար ռիսկեր են առաջանում. «Եթե տեսնում ենք, որ երկար են տևում աշխատանքները կամ պետք է կանգնեցնենք, կամ էլ հասկանանք՝ ինչ հաճախականությամբ, ինչ պայմաններում և ինչպես է այդ ամենը շարունակվելու, որպեսզի մեր հետագա պլանները ճիշտ կազմենք։ Հիմա մենք կաթ ենք մթերում, այդ մթերումը չի կարող շարունակվել, այդ դեպքում, երբ ապրանքը չի անցնում սահմանը։ Կարող է ամեն մեքենան մի ամիս կանգնեցնեն նրա համար, որ ստուգում են, բայց մեկ ստուգում են, մեկ՝ ոչ, մենք ինչ իմանանք մեր հաճախորդը մեր նշած ժամկետում կսպասի ապրանքին, թե՞ ոչ»։

Բաղդասարյանը հայտնեց, որ իրենք հաճախորդների հետ պայմանագրային պարտավորություններ ունեն, իսկ նման դեպքերում հաճախորդը կարող է հրաժարվել ապրանքից։

«Նույնը գյուղմթերքին է վերաբերում, կամայական մեկնաբանում են իրենց ստուգումները, մենք էլ ասում ենք՝ եթե ստուգում եք այնպիսի մեխանիզմով ստուգեք, որ մեզ հասկանալի լինեն ձեր քայլերի հաջորդականությունը, որպեսզի դրա վրա կառուցենք մեր մատակարարումը։ Շատ կամայական է լինում, կարող է ինչ-որ մեկը ձախ ոտքի վրա այդ օրն արթնացած լինի ու որոշի 2 շաբաթ պահել մեքենան»,-ասաց «Սպայկա»-ի ներկայացուցիչն ու ավելացրեց, որ պատկան մարմիններին ընդհանրապես չի հետաքրքրում, թե ապրանքի հետ ինչ կլինի, կամ էլ հաճախորդն ինչ կերպ կարձագանքի։

Բաղդասարյանի խոսքով, պատկան մարմիններն իրենց իրավունք են վերապահում քմահաճ կերպով անեն, ինչ ուզում են. «Մենք չենք ասում մի ստուգեք, կամ ինչու եք ստուգում, միայն ասում ենք՝ եթե տեղեկությունը արագ ենք տրամադրում, ուրեմն բարի եղեք դուք էլ արագ աշխատեք։ Գործընթացն արագ արեք, դա է մեր ուզածը, հատկապես, որ մի տնտեսական միության մեջ ենք ու բոլոր ուղեկցող փաստաթղթերը լիարժեք կան, որևէ սխալմունք չկա»։

Բաղդասարյանը հայտնեց նաև, որ անցակետում չկան համապատասխան սառնարաններ ապրանքը պահելու և ստուգումներ իրականացնելու համար, դրա պատճառով իրենց մեքենան պահվում է, որը դարձյալ մեծ գումարների հետ է կապված։

«Պատկերացրեք, որ ամեն մեքենայի մի օր կանգնելը 200 եվրո արժե, դա միջազգային ընդունված գին է։ Հիմա և՛ մեքենան են գերի վերցրել, և՛ ապրանքը։ Չեն կարող դատարկել, որովհետև սառնարան չունեն պահեստում պահելու համար։ Իրենց սառնարանում, որ դատարկեն ապրանքը միանգամից կփչանա, որովհետև համալիրը հագեցած չէ համապատասխան պայմաններով»,-ասաց Բաղդասարյանը։
Հարցին արդյո՞ք հատուկ միտում են տեսնում «Սպայկա»-ի նկատմամբ նման գործողություններ իրականացնելու հետ կապված՝ փոխտնօրենը պատասխանեց. «Այո, տեսնում եմ, քմահաճ վերաբերմունք է, դրա տակ ինչ կա՝ չեմ կարող ասել, բայց կամայականության վերին աստիճանն է, որովհետև սրանից առաջ նույն ապրանքը գնացել է որևէ խնդիր չի եղել, իսկ կտրուկ կանգնեցրել են ու չենք հասկանում ինչու»։

Բաղդասարյանը նշեց, որ իրենց հարցերին պատասխան չի տրվել։ «Միակ պատասխանն այն է, որ իրենք իրենց լիազորությունների շրջանակներում գործողություններ են իրականացնում, բայց թե երբ կավարտվի, ոնց կլինի, արդյոք միշտ է լինելու, ինչ-որ տրամաբանություն կա դրա տակ, այլ ապրանքներն էլ են նույն ճակատագրին արժանանալու թե ոչ՝ չեն ասում»,-ասաց ներկայացուցիչը։
Նա հայտնեց, որ իրենց հաճախորդն այսօր արդեն հայտնել է, որ պանրի ապրանքից հրաժարվել է և չգիտեն, թե ինչ է լինելու այդ ապրանքի հետ։

«Այդ ապրանքը շատ մեծ արժեք ունի և նման արժեքով ապրանքի կորստի պատճառով մարդիկ սնանկանում են։ Հիմա, որ հաճախորդը հրաժարվել է ապրանքից, ո՞վ է դրա համար պատասխան տալու։ Ստիպված ենք լինելու կաթի մթերումները դադարեցնել, որովհետև օրական 20 տոննա կաթ ենք մթերում, բայց պահեստում այդքան տեղ չունենք, դա արտադրվում, պանիր է դառնում և դուրս է գալիս, որից հետո նոր խմբաքանակն ենք ունենում։ Հիմա, եթե այս շուկան համարենք կորած՝ այսինքն` չաշխատենք ռուսական շուկայի հետ, ուրեմն ժամանակավորապես պետք է դադարեցնենք կաթի մթերումը։ Պատկերացնու՞մ եք այդ ժամանակ ֆերմերների վիճակը։ Ամեն օր կաթ են չէ՞ արտադրում, ի՞նչ են անելու այդ կաթը»,- ասաց «Սպայկա»-ի փոխտնօրենը։

Ամփոփելով խոսքը, նա շեշտեց, որ Լարսի հետ կապված խնդիրներ ունեն նաև այլ ընկերություններ, սակայն վախից լռում են։

Հեղինակ՝ Սոնա Գեւորգյան:

Աղբյուր` Փաստինֆո