Փաստ ինֆո

Եթե 20 երիտասարդ 1 տարով եկել է և պետությունը ծախսել է 90 մլն դրամ, հաջորդ տարի կատարողականը քնարկելիս, եթե պարզվի, որ ոչ ոք չի մնացել Հայաստանում, սա լա՞վ է, թե՞ վատ։ ԱԺ-ում բյուջե 2020-ի քննարկման ժամանակ նման հարց բարձրացրեց գիտության, կրթության, մշակույթի, սփյուռքի, երիտասարդության և սպորտի հարցերով մշտական հանձնաժողովի նախագահ Մխիթար Հայրապետյանը։

Վարչապետի աշխատակազմի սփյուռքի գործերի գլխավոր հանձնակատար Զարեհ Սինանյանը, ներկայացնելով հանրային ոլորտում սփյուռքահայ երիտասարդների մասնակցության ծրագիրը, ասաց որ նախատեսվում է Սփյուռքից 20 երիտասարդի 1 տարով հրավիրել՝ աշխատելու Հայաստանում։ Այս ծրագրի իրականացման համար պետբյուջեից նախատեսվում է տրամադրել 90 մլն դրամ։

Ֆինանսավարկային և բյուջետային հարցերի մշտական հանձնաժողովի նախագահ Մանե Թանդիլյանը հետաքրքրվեց՝ ծրագրի ավարտից հետո երիտասարդներն ի՞նչ պարտավորություններ ունեն ՀՀ-ի նկատմամբ՝ հաշվի առնելով այն, որ բոլոր ծախսերն իրականացվում է պետբյուջեից։

Զարեհ Սինանյանը նկատեց, որ օրինական պարտավորվածություն չկա։ Կա բարոյական պարտավորվածություն. «Մեր նպատակն է դրսում բարձրագույն կրթություն ստացած երիտասարդներին առհավետ կապել Հայաստանի հետ։ Նրանք այստեղ Գառնի-Գեղարդ գնալով չեն զբաղվելու։ Մեկ տարի աշխատելու են պետական օրգաններում, մեկ տարի իրենց գիտելիքները, կարողություններն ու ժամանակը, որն օգտագործում են ի շահ Հայաստանի։ Գումարի դիմաց ստանում ենք ակտուալ արժեք »,-ասաց Զարեհ Սինանյանը։

Մանե Թանդիլյանը համաձայնեց՝ լավ է, որ երիտասարդները գան, սակայն պնդեց՝ այդքան գումար է ծախսվում և բարոյականից զատ այլ պարտավորություններ պետք է սահմանել. «Օրինակ դրանից հետո 2-3 ամիս աշխատում եք ինչ-որ մարզում։ Կարծում եմ, որ այդքան գումար ծախսելուց հետո մենք պետք է նրանց գիտելիքը որևէ կերպ իրացվի»,-ասաց ԱԺ պատգամավորը։

Հեղինակ՝ Հասմիկ Կոշկարյան

Աղբյուր` Փաստինֆո