Փաստ ինֆո

Հեղափոխությունից հետո հայրենադարձված ընտանիքներ, իհարկե, կան։ Այս մասին լրագրողների հետ զրույցում ասաց վարչապետի աշխատակազմի սփյուռքի գործերի գլխավոր հանձնակատար Զարեհ Սինանյանը։

«Ինչ-որ ստատիստիկ իմաստով չեմ կարող ասել՝ քանի հոգի են, բայց, իհարկե, կան։ Ես անձնապես ճանաչում եմ մարդկանց, ընտանիքների, գիտեմ, որ հայրենադարձվել են։ Տարօրինակ բան եք ասում։ Օրինակ ես և իմ ընտանիքն էլ ենք հայրենադարձվել»,-ասաց Զարեհ Սինանյանը։
Դիտարկմանը, որ ինքն այստեղ պաշտոն է ստացել, Զարեհ Սինայանն արձագանքեց. «Ես այնտեղ պաշտոն ունեի։ Այնտեղ իմ պաշտոնը 900 մլն դոլարանոց բյուջե ուներ, իսկ ես այստեղ պայքարում եմ 1.5 մլն դոլարի համար»,-ասաց Սինանյանը։

Զարեհ Սինանյանը հավատում է՝ զանգվածային հայրենադարձություն կարող է լինել. «Մենք առնվազն հաջորդ երեք տարվա մեջ պետք է սկսենք զանգվածային հայրենադարձությունը։ Դրա նախադրյալները կան, պարզապես պետք է հաջորդ մի քանի տարվա ընթացքում հասնենք այդ կետին։ Պետք է հանենք բոլոր խոչընդոտները»։

Նա նաև նշեց, որ իր գերատեսչության աշխատանքն անշնորհակալ է։ Մարդիկ տատանվում են՝ ինչպես են իմանալու արդյունավետ են աշխատել, թե ոչ. «Ի տարբերությւոն մյուս գերատեսչությունների՝ դժվար է ներկայացնել արդյունքները։ Մենք անում ենք մի աշխատանք, որը շատ երկարաժամկետ է։ Ստեղծում ենք պայմաններ ավելի մոտ հարաբերությունների, ստեղծում ենք երկարաժամկետ հայրենադարձության պայմաններ։ Դժվար է դա մեկ տարվա ժամկետով չափել»,-հավելեց Սինանյանը։

Հարցին, եթե Սերժ Սարգսյանին ձերբակալեն, ներգաղ կլինի՞՝ Զարեհ Սինանյանն արձագանքեց. «Դա Սերժ Սարգսյանի թեզն է, ոչ թե իմ։ Ես լուրջ համակարգային փոփոխությունների մասին եմ ասում»։

Հեղինակ՝ Հասմիկ Կոշկարյան

Աղբյուր` Փաստինֆո