Փաստ ինֆո

«Երբ նայում ես՝ ինչ է կատարվում աշխարհում և ինչ է կատարվում Հայաստանում, տեսնում ես, որ ինչ-որ բան չի համընկնում։ Աշխարհում նոր իրավիճակ է ստեղծվել, այն համընդհանուր գլոբալիզացիայի, ինտեգրացիայի պայմանները փոխվել են նոր պայմանների։ Բոլոր պետությունների ներսում գլուխ են բարձրացնում այն ուժերը, որոնք ազգային են, պետականամետ են։ Եվրոպայում մեծ փոփոխություններ են կատարվում, վերադարձ է կատարվում ազգայինի, ինքնուրույնության, պետականության»,-այս մասին այսօր հրավիրված ասուլիսում ասաց Հանրային խորհրդի նախագահ Վազգեն Մանուկյանը։

Նրա խոսքով, տարածաշրջանում կտրուկ փոփոխություններ են տեղի ունենում, նոր հարաբերություններ են ստեղծվել Ռուսաստանի, Ադրբեջանի, Թուրքիաի և Իրանի միջև։

«Աշխարհը նոր փուլ է մտնում, և թվում էր, որ մենք պետք է դրա վրա կառուցենք մեր քաղաքականությունը, որովհետև սկսվում են նոր ժամանակներ, նոր մարտահրավերներ, վտանգներ ու հնարավորություններ։ Եվ բացի այս ամենից մենք տարածաշրջանում ունենք Արցախի հարցը, որը ոչ թե Արցախի ժողովրդի անվտանգության հարցն է կամ Արցախի ժողովրդի իղձերի հարցը, այլև սրանց հետ միասին դա նաև Հայաստանի անվտանգության հարցն է, դա ազգային երևույթից դուրս նաև անվտանգության հարց է բոլորիս համար»,-նշեց Մանուկյանը։

Հանրային խորհրդի նախագահի խոսքով, Արցախի հարցում բանակցություններ չկան, իսկ բանակցությունները պատերազմ չլինելու համար կանխարգելիչ բնույթ են կրում։ Նա նաև շեշտեց, որ երբ բանակցությունները վերջանում են պատերազմի հավանականությունը մեծանում է։

«Իսկ ի՞նչ է կատարվում Հայաստանի ներսում։ Ես, անկեղծ ասած, մեր հասարակությունն այսպես բզկտված, իրար նկատմամբ թույնով լցված չէի տեսել։

Արժեքավոր մարդկանց, օրինակ՝ Բաբլոյանի դեմ այդ քրեական գործը որ հարուցել են մարդու զարմանք է առաջացնում, Հայաստանի լավագույն բժիշկներից մեկը, մեր պարծանքը, որով հպարտանում ենք աշխարհով մեկ, հայտնվում է մի իրավիճակում, որ ինչ-որ ստորակետի պատճառով քրեական գործ են ստեղծում։ Հանում են Արցախի պաշտպանության նախարարին, որը լավագույն նախարարներից էր, սակայն ըստ իրենց մի նախադասություն ճիշտ չի ասել»,-ասաց Մանուկյանն ու ավելացրեց, որ անարժեք մարդիկ հետապնդում են շատ ավելի արժեքավոր մարդկանց։

Հեղինակ` Սոնա Գեւորգյան