Փաստ ինֆո

ՀՔԾ պետ Սասուն Խաչատրյանն այսօր հայտարարել է, թե անչափահաս երեխաների հետ ՀՀ ԱԺ աշխատակազմի ղեկավարի տեղակալ Արսեն Բաբայանի տեսակցության արգելքը թյուրիմացության հետեւանք է։

Ինչպես արդեն տեղեկացրել ենք՝ Արսեն Բաբայանը մեղադրվում է Սահմանադրական դատարանի լիազորություններին տիրանալուն օժանդակելու եւ պաշտոնեական փաստաթղթերը կեղծելու մեջ։ Նրա նկատմամբ որպես խափանման միջոց է ընտրվել կալանավորումը, միաժամանակ քննիչը որոշել է ագելանք դնել նրա՝ տեսակցությունների վրա, այդ թվում՝ անչափահաս երեխաների հետ։

«Յուրաքանչյուր կոնկրետ դեպքում քննիչն է գնահատում, թե որ խափանման միջոցն է ի զորու ապահովել մեղադրյալի պատշաճ վարքագիծը։ Տվյալ դեպքում գործը քննող քննիչն եկել է այն եզրահանգման, որ Բաբայանի պատշաճ վարքագիծը կարող է ապահովել միայն կալանավորման պայմաններում և հենց այդ նկատառումներով էլ արգելանք է դրվել տեսակցությունների վրա»,-այս մասին այսօր լրագրողների հետ ճեպազրույցում ասաց Հատուկ քննչական ծառայության պետ Սասուն Խաչատրյանը։

Հարցին՝ անչափահաս երեխաների հետ հանդիպումն ինչո՞վ է գործին խոչընդոտելու ՝ Սասուն Խաչատրյանն ասաց, թե տեղեկատվություն չունի, որ անչափահաս երեխաների հետ նրա շփումն արգելվել է։
«Եթե նման թյուրիմացություն եղել է, իհարկե, կշտկվի», - ասաց նա։

Պնդմանը, որ Նաիրի Հունանյանի դեպքում պատգամավորը կարող է տեսակցել, իսկ Արսեն Բաբայանի դեպքում՝ ոչ, ՀՔԾ պետը պատասխանեց. «Եկեք չնույնացնենք պատիժը կրող անձի հետ։ Նրանց կարգավիճակներն են տարբեր։ Նաիրի Հունանյանը դատապարտված է, պատիժ է կրում, իսկ Արսեն Բաբայանի նկատմամբ ընտրված է խափանման միջոց կալանավորումն ընտրվում է հենց այն նկատառումներով, որպեսզի բացառվի նաև նրա շփումն այլ անձանց հետ»։

Պատասխանելով մեկ այլ հարցի, թե եթե Հրայր Թովմասյանը հրաժարական տված լիներ Արսեն Բաբայանի դեմ գործ կհարուցվե՞ր, Խաչատրյանն ասաց, որ Հրայր Թովմասյանի հրաժարական տալ-չտալը քրեական գործի համար որևէ նշանակություն չունի. «Կրկին անգամ ասում եմ, որ ՀՔԾ-ն քաղաքականությամբ չի զբաղվում»։

Հեղինակ` Սոնա Գեւորգյան