Փաստ ինֆո

Ընտրվել է մի ժամանակահատված, երբ թուրք-ամերիկյան հարաբերությունները բավականին լարված են, և այդ լարվածությունը դրական ֆոն ձևավորեց, որպեսզի քվեարկությունը տեղի ունենա։ «Փաստինֆո»-ի հետ զրույցում այս կարծիքն արտահայտեց միջազգայնագետ Սուրեն Սարգսյանը։

Հիշեցնենք, որ երեկ՝ հոկտեմբերի 29-ին ԱՄՆ կոնգրեսի ներկայացուցիչների պալատում կայացած քվեարկության արդյունքում ձայների մեծամասնությամբ՝ 405 կողմ ձայնով ընդունեց Հայոց ցեղասպանությունը ճանաչող բանաձևը։

Չնայած բանաձևը քվեարկության համար վաղուց էր բերվել օրակարգ, բայց քվեարկվեց երեկ։ Միջազգայնագետի կարծիքով քվեարկության համար ընտրված ժամանակահատվածը պատահական չէր ընտրվել, այն ուղղակիորեն կապ ունի թուրք-ամերիկյան լարված հարաբերությունների հետ։ Սուրեն Սարգսյանը նկատեց, որ քվեարկության համար բավական լուրջ աշխատանք են իրականացրել նաև հայկական համայնքը և լոբիստական կառույցները։ Սուրեն Սարգսյանը, խոսելով հետագա գործընթացների մասին, ասաց.

«Սա հայտարարության տեքստ է, որը տարածվել է Միացյալ նահանգների ներկայացուցիչների պալատի կողմից։ Կարծում եմ՝ մոտ ժամանակներս համանման քվեարկություն կլինի նաև Միացյալ նահանգների սենատում, որովհետև նման բանաձև ներկայացված է նաև այնտեղ։ Երբ Սենատում տեղի ունենա այդ քվեարկությունը, գործ կունենանք մի իրավիճակի հետ, որ կոնգրեսի երկու պալատներն էլ ընդունած կլինեն ցեղասպանության վերաբերյալ բանաձևերը»,-ասաց միջազգայնագետ։

Վերջինս չի կարծում, թե ԱՄՆ-ն Հայաստանից փոխադարձ սպասելիքներ ունի, քանի որ սա վարչակազմի կողմից դեռևս ճանաչում չի նշանակում. «Սա չի նշանակում, որ ԱՄՆ-ն պաշտոնյաներին արդեն թույլատրելու է օգտագործել ցեղասպանություն բառը։ Երբ ունենանք այնպիսի իրավիճակ, որ նախագահն օգտագործի այդ բառը և ցեղասպանություն բառի վրայից դուրս գա տաբուն, այդ ժամանակ գործ կունենանք ճանաչված փաստի հետ»,-ասաց Սուրեն Սարգսյանը։

Թիվ 296 բանաձեւում նշվում է.

1) ոգեկոչել Հայոց ցեղասպանությունը` այն պաշտոնապես ճանաչելու և հիշատակելու միջոցով,

2) մերժել Միացյալ Նահանգների կառավարությանը՝ Հայոց ցեղասպանության կամ որևէ այլ ցեղասպանության ժխտման մեջ ներգրավելու, ներառելու կամ որևէ այլ կերպ առնչելու փորձերը, և

3) խրախուսել Հայոց ցեղասպանության փաստերի՝ ներառյալ մարդասիրական օգնության գործում Միացյալ Նահանգների դերի և մարդկության դեմ ներկայումս իրականացվող հանցագործությունների ու Հայոց ցեղասպանության միջև առնչությունների վերաբերյալ կրթությունը և հանրային իրազեկվածությունը»:

Հեղինակ` Հասմիկ Կոշկարյան