Փաստ ինֆո

Դատախազը հրաժարվել է արդարացման դատական ակտի դեմ բերված բողոքից Էրեբունի և Նուբարաշեն վարչական շրջանների քննչական բաժնի պետի տեղակալ Բունիաթ Եղիազարյանի գործով դատախազ Մնացականյանը հրաժարվել է իր իսկ կողմից ներկայացված վերաքննիչ բողոքից: «Փաստինֆո»-ի հաղորդմամբ, Վերաքննիչ դատարանը՝ նախագահությամբ Արղամանյանի, Ազարյանի և Հովհակիմյանի ելնելով վերոգրյալից որոշել է վերաքննիչ վարույթը կարճել:

Առանձնապես խոշոր չափերով կաշառք ստանալու մեջ մեղադրվող Բունիաթ Եղիազարյանն առաջին ատյանի դատարանի դատավճռով արդարացվել էր առաջադրված մեղադրանքում՝ հանցակազմի բացակայության պատճառաբանությամբ և դատախազ Մնացականյանն արդարացման դատական ակտը բողոքարկել էր Վերաքննիչ դատարան՝ պահանջելով ամբողջությամբ բեկանել և հոդվածի սանկցիայի շրջանակներում նշանակել համաչափ պատիժ:

Ավելի վաղ տեղեկացրել էինք, որ, ըստ նախաքննության վարկածի,Բունիաթ Եղիազարյանը ՀՀ քննչական կոմիտեի Էրեբունի և Նուբարաշեն վարչական շրջանների քննչական բաժնում ՀՀ քրեական օրենսգրքի 112-րդ հոդվածի հատկանիշներով հարուցված և նույն բաժնի ավագ քննիչ Միքայել Զադոյանի վարույթում քննվող գործով վերջինիս հետ նախնական համաձայնությամբ Բաբկեն Գասպարյանի որդու՝ Սոս Գասպարյանի օգտին իրենց լիազորությունների շրջանակում գործողություններ կատարելու դիմաց ՀՀ փաստաբանների պալատի փաստաբան Գայանե Գալոյանի օժանդակությամբ և միջոցով Բաբկեն Գասպարյանից ստացել են առանձնապես խոշոր չափերով կաշառք։ Մ.Զադոյանն ընդունել է կաշառք ստանալու առաջարկը, այնուհետև այդ մասին հայտնել է նաև իր վերադասին` Բունիաթ Եղիազարյանին, ով վերջինիս հետ նախնական համաձայնության գալով, իր հերթին Բ.Գասպարյանին խոստացել է նրա որդու օգտին իր լիազորությունների շրջանակներում գործողություններ կատարել:

Այնուհետև Միքայել Զադոյանը մեղադրյալի հորն ուղարկել է փաստաբան Գայանե Գալոյանի մոտ` նրա միջոցով կաշառքի գումարն ստանալու և քրեական գործի ընթացքն ուղղորդելու համար: ՀՀ քննչական կոմիտեի պաշտոնատար անձանց հետ նախապես ձեռք բերված պայմանավորվածության համաձայն` Գ.Գալոյանը, վերջիններիս համար վերացնելով անձամբ կաշառատուից գումարն ստանալու պարագայում հավանական բացահայտման խոչընդոտը, Բ. Գասպարյանից 2016թ. դեկտեմբերի 29-ին ստացել և Մ. Զադոյանին ու Բ.Եղիազարյանին է փոխանցել 3000 ԱՄՆ դոլար կաշառքը:

Այսպիսով՝ դատախազը եւս ընդունել է, որ առաջադրված մեղադրանքն անհիմն է եղել, արդարացման դատավճիռը՝ արդարացված։

Հեղինակ՝ Էլեն Առաքելյան

Աղբյուր` Փաստինֆո