Փաստ ինֆո

Ես չեմ հիշում վերջին տարիներին նման դեպք, երբ ասուլիսին կամ քննարկմանը լրատվամիջոցին ներս չթողնեն։ «Փաստինֆո»-ի հետ զրույցում այս կարծիքն արտահայտեց ԱԺ մարդու իրավունքների հանձնաժողովի նախագահ Նաիրա Զոհրաբյանը՝ անդրադառնալով Ստյոպա Սաֆարյանի կազմակերպած քննարկմանը որոշ լրատվամիջոցների մուտքի արգելքին։

«Ես դա համարում եմ լրատվամիջոցների գործունեության կոպտագույն խախտում, դա անթույլատրելի է։ Կարծում եմ՝ Ստյոպա Սաֆարյանն իրեն թույլ չի տա լրատվամիջոցների հանդեպ նման վերաբերմունք։ Հակառակ պարագայում դա անընդունելի է, քանի որ եթե հրավիրում են ասուլիս կամ քննարկում, նշանակում է՝ պետք է պատրաստ լինեն լսելու նաև իրենց ոչ հաճո հարցեր»,-ասաց ԱԺ պատգամավորը։

Նա ընդգծեց, որ իրենք որպես քաղաքական գործիչներ, երբ դուրս են գալիս՝ պատասխանելու լրատվամիջոցների հարցերին, չեն զտում դրանք։ Նաիրա Զոհրաբյանը չբացառեց, որ կարող են հնչել նաև այնպիսի հարցեր, որոնք իրենց դուր չգա, բայցև նկատեց, որ իրենք պետք է ունենան բոլոր հարցերի պատասխանները. «Եթե ասուլիս են հրավիրում, ենթադրվում է, որ պետք է պատրաստ լինեն լսել ոչ միայն իրենց շոյող, այլև այլ որակի հարցադրումներ, ուստի մի քիչ հասկանալի չէ լրատվամիջոցների այս սելեկցիան»,-ասաց Նաիրա Զոհրաբյանը՝ հավելելով, որ եթե քննարկումն այնուամենայնիվ կայանա և այդ լրատվամիջոցների մուտքն արգելվի, ապա ինքը որպես Մարդու իրավունքների հանձնաժողովի նախագահ անպայման կանդրադառնա այս հարցին։

«Փաստինֆո»-ն այս հարցի շուրջ զրուցեց նաև «Իմ քայլը» խմբակցության պատգամավոր Թագուհի Թովմասյանի հետ։ Նախկինում լրագրող, իսկ այժմ պատգամավոր Թագուհի Թովմասյանը նույնպես դեմ է շերտավորմանը։ Կարծում է՝ բոլոր լրատվամիջոցներն ունեն հավասար իրավունքներ, որը պետք է միշտ արձանագրվի։

«Տեղեկացա, որ Արամ Սարգսյանն ու Անահիտ Բախշյանը բոյկոտել են այդ միջոցառումը։ Չեն գնալու, թերևս, հենց այդ պատճառով, որ լրատվամիջոցների միջև տարբերակում է դրվել»,-ասաց պատգամավորը՝ նշելով, որ սա պետք է լինի վատ նախադեպ. «Այլևս երբեք որևէ մեկը չպետք է փորձի կրկնել լրատվամիջոցի «իմ ու քո»-ի «մերոնք-ձերոնք»-ի բաժանելու արատավոր այդ սկզբունքը, որն ի դեպ գալիս է նախորդ իշխանություններից»,-նշեց Թագուհի Թովմասյանը։

Հարցին ՝ արդյոք նախկինում եղե՞լ են նման դեպքեր, պատգամավորն արձագանքեց. «Շատ են եղել։ Ես որպես լրագրող իմ գործունեության ընթացքում հիշում եմ, որ նախագահականի սև ցուցակում էինք։ Մեզ ոչ մի միջոցառման չէին հրավիրում»,-ասաց Թագուհի Թովմասյանը՝ հավելելով, որ կզրուցի Ստյոպա Սաֆարյանի հետ՝ հասկանալու որն է լրատվամիջոցների տարբերակման անհրաժեշտությունը և կհորդորի նրան՝ նման բան չանել։

Նշենք, որ այսօր Միջազգային և անվտանգության հարցերի հայկական ինստիտուտի գրասենյակում տեղի է ունենալու «Հոկտեմբերի 27-ից 20 տարի անց. Հայացք անցյալին, դասեր և մտորումներ» խորագրով քննարկում։ Քննարկման կազմակերպիչ Ստյոպա Սաֆարյանը ֆեյսբուքյան իր էջում գրել էր, որ մուտքը news.am, hayeli.am, 168.am, yerevantoday, 7or.am, livenews.am, 5-րդ ալիք և Երկիր մեդիա հեռուստաընկերությունների առջև փակ է։

Հեղինակ` Հասմիկ Կոշկարյան