Փաստ ինֆո

«Երբ մենք խոսում ենք օրենքից դուրս, իրավունքից դուրս գործընթացների մասին, այդտեղ փնտրել տրամաբանություն, որեւէ իրավական հիմնավորում, անշնորհակալ գործ է։ Այդպես են ուզել, այդպես են արել, ինչպես ուզել են եւ ակնհայտ ապօրինի այդ գործը հարուցել են»,-«Փաստինֆո»-ի հետ զրույցում ասաց ԱԺ աշխատակազմի ղեկավարի նախկին տեղակալ Արսեն Բաբայանի պաշտպան Երվանդ Վարոսյանը՝ անդրադառնալով այն հարցին, թե ինչով կարելի է բացատրել իրավապահների որոշումը՝ նույն քրեական գործի շրջանակում Արսեն Բաբայանին կալանավորելու, իսկ նախկին նախագահ Արա Բաբլոյանի նկատմամբ ստորագրությունը չհեռանալու մասին խափանման միջոց ընտրելու վերաբերյալ։

Հիշեցնենք, ՀՀ ԱԺ պատգամավոր Արման Բաբաջանյանի կողմից ՀՀ գլխավոր դատախազություն ներկայացված հաղորդման հիման վրա ՀՔԾ-ում նախ ՀՀ քրեական օրենսգրքի 300-րդ հոդվածի 1-ին մասով քրեական գործ հարուցվեց: Նույն գործի շրջանակում ձերբակալվեց, այնուհետ կալանավորվեց ԱԺ աշխատակազմի ղեկավարի նախկին տեղակալ Արսեն Բաբայանը, որին մեղադրանք առաջադրվեց ՀՀ քրեական օրենսգրքի 38-300-րդ հոդվածի 1-ին մասով և 314-րդ հոդվածի 1-ին մասով՝ ՍԴ լիազորություններին տիրանալուն օժանդակելու եւ պաշտոնեական կեղծիք կատարելու համար։ Արդեն երեկ ԱԺ նախկին նախագահ Արա Բաբլոյանին եւս մեղադրանք առաջադրվեց՝ ՍԴ լիազորություններին տիրանալու եւ պաշտոնեական կեղծիքի համար՝ Քր.օր. 300-րդ հոդվածի 1-ին մասով եւ 314-րդ հոդվածի 1-ին մասով։

Երվանդ Վարոսյանը նշում է, որ ստեղծված իրավիճակում իրենք պարտավոր են օրենքով սահմանված բոլոր միջոցներով խնդիրը բարձրացնել, որովհետեւ եթե անգամ օրվա իշխանությունից ճիշտ իրավական ու քաղաքական լուծումներ չեն ակնկալում, միեւնույն է՝ անձի շահերը պետք է ամբողջ ծավալով պաշտպանել, որպեսզի գոնե ՄԻԵԴ-ում հնարավորություն լինի իրավունքի վերականգնում ակնկալել։

«Փաստինֆո»-ն տեղեկացրել է, որ Իրավապաշտպան, «Հայաստանի Հելսինկյան կոմիտե» ՀԿ նախագահ Ավետիք Իշխանյանը և Արցախի Հանրապետության Մարդու իրավունքների պաշտպան Արտակ Բեգլարյանը (անձնական կարգավիճակով) գրավոր դիմել են քրեական հետապնդման մարմիններին՝ պատրաստակամություն հայտնելով իրենց խոսքով և վճարվող գումարով երաշխավորելու Արսեն Բաբայանի պատշաճ վարքագիծը քրեական գործի քննության ընթացքում։

ԱԺ աշխատակազմի ղեկավարի նախկին տեղակալ Արսեն Բաբայանի պաշտպանների միջնորդությունը դատախազությունը կքննարկի սովորական ընթացակարգով։ Վարոսյանի խոսքով՝ մի քանի օրվա խնդիր է։ «Կարծում եմ կամ այս շաբաթվա վերջին կամ եկող շաբաթվա սկզբին պատասխան կարող ենք ակնկալել»,-նշեց փաստաբանը։

Վարոսյանը չի բացառում, որ իշխանությունը Արսեն Բաբայանին կալանքի տակ պահելով, փորձում է հենց կալանքի միջոցով նրա նկատմամբ ճնշում գործադրել։ «Երբ ապօրինության մասին ենք խոսում, ցանկացած նպատակ կարող ենք դրա տակ տեղավորել, ուղղակի Արսեն Բաբայանի պարագայում կարծում եմ՝ դա անիմաստ է եւ իշխանությունը դա պետք է հասկացած լիներ մինչեւ նրան ազատազրկելը»,-ասաց Վարոսյանը։

Դիտարկմանը, թե մեղադրանքի տրամաբանությամբ, եթե դիտարկենք իրավիճակը, ստացվում է, որ բոլոր այն պատգամավորները, որոնք ժամանակին խորհրդարանում կողմ են քվեարկել ՍԴ նախագահ Հրայր Թովմասյանի թեկնածությանը, օժանդակել են ՍԴ լիազորությունների յուրացմանը, Երվանդ Վարոսյանն արձագանքեց.«Կոպիտ ասած՝ ամեն ինչ հնարավոր է, բայց այստեղ քրեական գործ չկա, արարք չկա, մեղադրանք չկա։ Այստեղ կա ՀՔԾ-ի հրամցրած մի հեքիաթ, որը ոչ իրականության հետ կապ ունի, ոչ իրավաբանության։ Թե այդ գործը թխվել է ՀՔԾ-ում, թե այլ մարմիններ են մասնակցել, դա էլ հետագայում ենք պարզելու։ Դրա համար հիմա խոսել, թե ինչ կարող են անել...ամեն ինչ կարող են անել, բոլշեւիկները գնդակահարում էին մարդկանց պատերի տակ»։

Հարցին, մեղադրանքի տրամաբանության շրջանակում, ստացվում է, ապագայում չի բացառվում նմանատիպ մեղադրանքներ դիցուք, Հրայր թովմասյանի օգտին քվեարկած պատգամավորների նկատմամբ, Երվանդ Վարոսյանն արձագանքեց. «Այդ հարցը Սասուն Խաչատրյանին պետք է տալ»։

Աղբյուր` Փաստինֆո