Փաստ ինֆո

Այն ինչ տեղի ունեցավ ՊԵԿ աշխատակից Հայկ Մարտիրոսյանի հետ Նորագավիթի ավտոմաքսատուն ՀՀ վարչապետ Նիկոլ Փաշինյանի այցից հետո, ոչ միայն վարչապետի սխալն էր, այլեւ ՊԵԿ ղեկավարության։

«Փաստինֆո»-ի հետ զրույցում նման կարծիք հայտնեց «Թրանսփարենսի ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը։

«Այդ ժամանակ նրա կողքին կանգնած էր Անանյանը՝ ՊԵԿ նախագահը։ Ես մեկ այլ խնդիր եմ տեսնում, որ Հայկ Մարտիրոսյանի՝ անմիջական ղեկավարը,  Դավիթ Անանյանը վարչապետին որեւէ բան չասացին եւ իսկապես, հետո ծառայողական քննություն չնշանակեցին, այսինքն, շատ հաճախ մեզ մոտ այն մտայնությունը կա, որ ահա Նիկոլը՝ առաջին դեմքն այսպես վարվեց, բայց եկեք հասկանանք, իսկ ինչպե՞ս վարվեցին նույն Անանյանը եւ Մարտիրոսյանի անմիջական ղեկավարը։ Այստեղ այդ ծառայամտությունն է ավելի վտանգավոր, որ նա ասաց՝ եւ վերջ, պետք է արվի։ Ինչպես նախկինում էր՝ ՀՀԿ-ականների ժամանակ, հիմա էլ նույն վիճակն է՝ ոչ թե օրենքն է օրենք, այլ ասածն է օրենք»,- «Փաստինֆո»-ին ասաց Վարուժան Հոկտանյանը։

Հիշեցնենք, վարչապետ Նիկոլ Փաշինյանը Ֆեյսբուքյան էջի միջոցով տեղեկացրել է, թե այսօր ՊԵԿ նախագահ Դավիթ Անանյանին հրահանգել է Մարտիրոսյանին կրկին ծառայության ընդունել ՊԵԿ համակարգում, բնականաբար՝ համաձայնությամբ: Գրառման մեջ Փաշինյանը հիշեցրել է, որ ապրիլի 9-ին Երեւանի ավտոմաքսատուն այցելության ընթացքում հրահանգեց աշխատանքից ազատել մաքսային մի ծառայողի (հետագայումն պարզվեց, որ նրա անունը Հայկ Մարտիրոսյան է)՝ Հայաստանի Հանրապետության պետական դրոշի նկատմամբ ոչ պատշաճ վերաբերմունք ցուցաբերելու պատճառով: Վարչապետը գտնում է, որ այս ժամանակահատվածը բավարար էր բոլորիս համար՝ տվյալ իրավիճակի վերաբերյալ պատշաճ հետեւություններ անելու համար:

Նշենք, որ Հայկ Մարտիրոսյանը Փաշինյանի այցից մի քանի օր առաջ էր աշխատանքի ընդունվել՝ հայտարարված մրցույթում ստանալով բարձր միավորներ։ Իսկ այդ դեպքից հետո՝ ամիսներ շարունակ, չի ունեցել աշխատանք։

«Երեւի խղճի խայթ է ունեցել»,-անդրադառնալով Փաշինյանի գրառմանը ասաց Վարուժան Հոկտանյանը։ Հարցին, արդյո՞ք սա պաշտոնական դիրքի չարաշահում չէ, Վարուժան Հոկտանյանը պատասխանեց. «Բնականաբար, նորից նույն պատասխանը կտամ, որ հիմա էլ պետք է ամեն ինչ արվի օրենքով։ Ինչպես մարդկանց ազատումը աշխատանքից պետք է լինի օրենքով, այնպես էլ՝ աշխատանքի ընդունումը։ Նույն նախարարների աշխատավարձերի պատմությունն էլ ցույց տվեց, որ վարչապետի ենթակաները առաջնորդվում են ոչ թե օրենքով, այլ վերեւի ցուցումներով ու դա չի ընկալվում որպես սխալ գործելակերպ։ Սա ես ավելի լուրջ խնդիր եմ համարում։ Ասողը ինքն է, բայց այդ քայլերին դիմողը, այդ ամենը իրականացնողը ինքը չէ»։

Նշենք, որ մաքսային ծառայություն կատարած այցի ժամանակ վարչապետ Նիկոլ Փաշինյանը զայրացել էր աշխատակցի կեցվածքից։ Նա Հայկ Մարտիրոսյանին ուղղակիորեն հրամայել էր դիմում գրել։ «Աշխատավարձդ կծախսես, դրոշը կդնես գլխավերևում, հետո դիմումդ կգրես, կգնաս տուն, լսեցի՞ր: Ով աշխատել է այդ սենյակում, բոլորը հեռացվեն աշխատանքից, կզեկուցեք անձամբ ինձ»,- հայտարարել էր վարչապետը։ Տեղում վարչապետի այցը լուսաբանող տեսախցիկները սակայն, ֆիքսել էին, որ դրոշը ոչ թե գետնին ընկած է եղել, այլ պատին հենած։ Միջադեպից հետո մամուլը գրեց, որ աշխատանքից ազատված երիտասարդը ողնաշարի խնդիր է ունեցել: Իսկ ՊԵԿ-ը որեւէ ծառայողական քննություն չանցկացրեց՝ պարզելու, թե ով է եղել դրոշի պատասխանատում եւ ինչ հանգամանքներում է այն պատին հենած վիճակում հայտնվել՚ ՊԵԿ-ից հայտարարել էին, թե աշխատանքից ազատման դիմումը Հայկ Մարտիրոսյանը կամավոր է գրել, մինչդեռ իրավապաշտպաններն ահազանգեցին, որ նրա ազատումն ապօրինի է եւ ՄԻԵԴ դիմելու դեպքում, միանշանակ, Հայկ Մարտիրոսյանը կշահի գործը։

Աղբյուր` Փաստինֆո