Փաստ ինֆո

Կոպերի այտուցվածությունը և թարթիչների թեփոտվածությունը կարող են վկայել աչքի բորբոքվածության մասին։  Բնակչության մոտ աչքի ամենատարածված հիվանդություններից մեկը դեմոդեկոզն է։ Այս հիվանդության հարուցիչը համարվում է դեմոտեքս տիզը, որի փոքր քանակությունը համարվում է օրգանիզմի նորմալ միկրոֆլորայի բնակիչ,  սակայն իմունիտետի անկման հետևանքով  առաջացնում է աչքի բորբոքային հիվանդություններ։

«Փաստինֆո»-ի հետ զրույցում «Սիրմեդ» ԲԿ-ի ակնաբույժ Ասյա Եղունյանը նշեց, որ հիվանդները հիմնականում բողոքում են աչքի կարմրածությունից, քորի, այրոցի զգացողությունից. «Երբ կատարում ենք աչքի բիոմիկրոսկոբիկ հետազոտություն, հայտնաբերում ենք թարթիչների արմատներին թեփոտվածություն, այնուհետև այս ախտահարված հատվածներից կատարում ենք թարթիչների քննություն, որի ժամանակ էլ հայտնաբերվում է տիզը և արդեն կազմակերպում ենք համապատասխան բուժում»,-ասաց բժիշկը։

Բուժումը տևում է մոտ երկու ամիս։ Կարևոր է այս ընթացքում հետևել կոպերի հիգիենային։ Մասնագետները խորհուրդ են տալիս առավոտյան և երեկոյան կոպերի եզրերն ախտահանել  թեյի ծառի յուղով և հակաբորբոքային քսուքներով։ Ակնաբույժի խոսքով երկու ամիս բուժումից հետո հիվանդը կրկին հանձնում է անալիզ, որի ժամանակ արդեն տեսնում ենք պետք է շարունակել, թե կարող ենք դադարեցնել բուժումը։ Եթե անալիզի արդյունքները ցանկալի չեն, ապա աչքի խնամքը շարունակվում է ևս երկու ամիս։ Հիվանդությունը բարեբախտաբար բացասական հետևանքներ չի թողնում տեսողության վրա. «Հիվանդները գանգատվում են աչքերի հոգնածությունից, կոպերի ծանրությունից ։ Իրենց թվում է, թե լարվածություն կա , սպազմ կա, բայց իրականում դա դրա հետ կապ չունի։ Չորության հետևանքով են առաջանում նմանատիպ խնդիրները։ Տեսողության վատթարացում տեղի չի ունենում»,-ասաց ակնաբույժը։

Աղբյուր` Փաստինֆո