Փաստ ինֆո

«Մանուշակ» մանկապարտեզում 3-ամյա երեխային պատանդ վերցնելու, սպանության փորձի, մանկապարտեզի աշխատակիցներին մարմնական վնասվածքներ հասցնելու մեղադրանքով 10-ը տարի ժամկետով ազատազրկման դատապարտված Արգամ Հովիկյանի պատժաչափը նվազել է: Նախօրեին Վերաքննիչ քրեական դատարանը՝ նախագահությամբ Արղամանյանի, դատավորներ Ազարյանի և Հովհակիմյանի, վերավորակել է սպանության փորձի հատկանիշներով առաջադրված մեղադրանքը 117-րդ հոդվածով և թողել պատիժը կրելու 8 տարի ժամկետով ազատազրկում և 100 000 դրամ տուգանք:

«Փաստինֆո»-ի հաղորդմամբ՝ Արգամ Հովիկյանի պաշտպաններ Գարիկ Գալիկյանը և Արամ Ղազարյանը վերաքննիչ բողոք էին ներկայացրել պահանջով բեկանել Հովիկյանի վերաբերյալ 08.04.2019թ. դատավճիռը միայն ՀՀ քրեական օրենսգրքի 34-104-րդ հոդվածի 1-ին մասով՝ ճանաչել անմեղ և նրա նկատմամբ կայացնել արդարացման դատական ակտ: Հիշեցնեքն, որ առաջին ատյանի դատարանի դատական ակտով Հովիկյանը մեղավոր էր ճանաչվել ՀՀ քրեական օրենսգրքի 34-104-րդ հոդվածի 1-ին մասով, 218-րդ հոդվածի 2-րդ մասի 3-րդ և 4-րդ կետերով, 113-րդ հոդվածի 1-ին մասով և 235-րդ հոդվածի 4-րդ մասով: Նրա նկատմամբ վերջնական պատիժ էր նշանակվել 10 տարի ժամկետով ազատազրկում:

Ըստ մեղադրանքի՝ 2017թ. հոկտեմբերի 30-ին` ժամը 16-ի սահմաններում Հովիկյանը մտել է «Մանուշակ» մանկապարտեզի վարչական շենք, կրտսեր 1-ին խմբի երեխաների համար նախատեսված ննջասենյակ և կնոջը՝ մանկապարտեզի աշխատակից Լիլիթ Հովհաննիսյանին, որի հետ բաժանվելուց հետո գտնվում էր լարված հարաբերությունների մեջ, հայտնել, որ ցանկանում է առանձնազրույց ունենալ նրա հետ` պահանջելով դուրս գալ մանկապարտեզից: Լիլիթ Հովհաննիսյանը հրաժարվել է զրուցել ամուսնու հետ, ինչից հետո վերջինս բաճկոնի տակից հանել է որսորդական դանակը և, բռնելով Լիլիթ Հովհաննիսյանի մազերից` քարշ է տվել մանկապարտեզի շինության մուտքի դռան մոտ` ցանկանալով նրան դուրս բերել շենքից: Լիլիթ Հովհաննիսյանը կառչել է մուտքի դռնից ներս տեղակայված աստիճանների ճաղավանդակներին և դիմադրել, որի ընթացքում Արգամ Հովիկյանը ձեռքին եղած դանակով դիտավորությամբ հարվածներ է հասցրել կնոջ դեմքին և կրծքավանդակին՝ առողջությանը պատճառելով միջին ծանրության վնաս: Այդ պահին նրանց է մոտեցել Լիլիթ Հովհաննիսյանի տատը՝ նույն մանկապարտեզի տնօրեն Ռոզա Վարդանյանը՝ փորձելով օգնություն ցույց տալ թոռանը:

Հովիկյանը դանակով հարվածել է նրա պարանոցի հատվածին: Սակայն վերջինս հետ է քաշվել, որի արդյունքում հարվածն ամբողջ ուժգնությամբ տեղի չի ունեցել: Մակերեսորեն վնասվել է Ռոզա Վարդանյանի պարանոցն ու ձախ ականջը: Երբ Լիլիթ Հովհաննիսյանն ազատվել է Հովիկյանից ու դիմել է փախուստի, նախկին ամուսինը մանկապարտեզի ննջասենյակում պատանդ է վերցրել նույն մանկապարտեզի ակնհայտ անչափահաս սաներից մեկին և իր մոտ գտնվող դանակի սպառնալիքով պատանդ պահել նրան՝ վերջինիս ազատելու համար իրավապահ մարմինների աշխատակիցներից պահանջելով հանդիպում կազմակերպել կնոջ հետ: Սակայն ձեռնարկված միջոցառումների արդյունքում նույն օրը` ժամը 20:00-ի սահմաններում, նա վնասազերծվել էր և ձերբակալվել:

Հեղինակ` էլեն Առաքելյան