Փաստ ինֆո

Տեսնում ենք, որ սեռային փոքրամասնություններն ուշադրության կիզակետում են, բայց զարմանալի է, որ դա արվում է հենց ազգային արժեքների հաշվին։ «Փաստինֆո»-ի հետ զրույցում այս կարծիքն արտահայտեց ազգագրագետ Սվետլանա Պողոսյանը։

Նա, անդրադառնալով ծանրամարտիկ Մելինե Դալուզյանի մասին պատմող «Մել» ֆիլմի նկարահանմանը տրամադրվող պետական աջակցությանը, նկատեց.

«Եթե ֆիլմ ենք նկարահանում, հայկական ֆիլմ, պետք է փորձենք աշխարհին ներկայացնել մեր կարևորագույն արժեքները։ Աշխարհին պետք է ներկայանանք մեր մշակութային ժառանգությամբ, մեր պատմությամբ, մեր մշակույթով»,-ասաց Սվետլանա Պողոսյանը։

Նրա կարծիքով ունենք բազմաթիվ կարևոր խնդիրներ և գերակայություններ, որոնց էլ պետք է անդրադառնանք. «Եթե խոցելի խմբերի մասին ֆիլմ ենք ուզում նկարահանել, ապա կարող ենք անդրադառնալ կենսաթոշակառուներին, որոնք լուրջ խնդիրներ ունեն, մանկատան կամ ծերանոցի շահառուները։ Բավական շատ խոցելի խմբեր ունենք և կարծում եմ՝ նրանք առավել շատ հոգածության կարիք պետք է ունենան»,-ասաց ազգագրագետը՝ ընդգծելով, որ եթե մենք աշխարհին ասելիք ունենք, ապա դա պետք է լինի մեր մշակույթի միջոցով։

Ազգագրագետի կարծիքով հանրությունը կանցնի նաև այս փորձության միջով. «Հազարամյակների բովով անցած ազգ ենք։ Բավականաչափ փորձություններ են եղել, և մենք կարողացել ենք դիմակայել։ Սրան էլ կդիմակայենք»։

Սվետլանա Պողոսյանը չի բացառում նաև այն հանգամանքը, որ այս ֆիլմն առնչություն ունի նաև օրակարգում առկա Ստամբուլյան կոնվենցիայի հետ. «Կարծում եմ՝ այո, այն ուղղակիորեն առնչվում է դրա հետ»,-ասաց ազգագրագետը։

Հիշեցնենք, որ պետությունը 20 միլիոն դրամ կտրամադրի ծանրամարտիկ Մելինե Դալուզյանի մասին պատմող «Մել» ֆիլմի նկարահանմանը։ Ֆիլմում կներկայացվի սեռափոխության ենթարկված Մելի և նրա ընկերուհու պատմությունը, սեռային փոքրամասնությունների իրավունքների պաշտպանությանն ուղղված պայքարը։ «Մել»-ը 2019 թվականին Հայաստանի ազգային կինոկենտրոն ներկայացված 65 լիամետրաժ և կարճաժամկետ ֆիլմերից պետական ֆինանսավորման համար ըտրված 10 լիամետրաժ ֆիլմերի ցանկում է։

Հեղինակ` Հասմիկ Կոշկարյան