Փաստ ինֆո

«Հանրային մտածողության մեջ կա շատ օբյեկտիվ եւ բնական ձգտում, զոհերի հարազատներն էլ, բնական է, որ կցանկանային ոճրագործությունը բացահայտվեր, բայց ես խիստ կասկածում եմ՝ արդյոք հանրային հնչեղություն ունեցող գործին մոտենալը, այն վերաբացելը նոր հանրային կրքեր չի՞ բորբոքի եւ արդյոք այսօր գոյություն ունեցող միջավայրը նպաստավոր է նման խնդիրներ լուծելու համար»,-«Փաստինֆո»-ի հետ զրույցում ասաց Հոկտեմբերի 27-ի ականատես, նախկին վարչապետ, ԱԺ նախկին նախագահ Խոսրով Հարությունյանը՝ անդրադառնալով Հոկտեմբերի 27-ի գործի հնարավոր վերաբացմանը։

Նշենք, որ Հոկտեմբերի 27-ի ահաբեկչության կազմակերպիչ Նաիրի Հունանյանը սեպտեմբերի 11-ին դիմում է ներկայացրել` վաղաժամկետ ազատ արձակման խնդրանքով։ Քրեակատարողական ծառայության հանրային բաժնի պետ Նոնա Նավիկյանը մեզ փոխանցել էր, որ սահմանված կարգով դիմումը քննարկվելու է 80-օրյա ժամկետում։Այս տեղեկության հրապարակումից հետո անկախ պատգամավոր Արման Բաբաջանյանը հայտարարեց, որ հանդիպել է Նաիրի Հունանյանի հետ եւ 2.5 ժամ զրուցել նրա հետ։ Իսկ իշխանական պատգամավոր Անդրանիկ Քոչարյանը չէր բացառել Նաիրի Հունանյանի հետ գործարքի հնարավորությունը։

Նկատենք, որ շուրջ 9 տարի է, ինչ Նաիրի Հունանյանը գտնվում է հոգեմետ դեղերի ազդեցության տակ։

Խոսրով Հարությունյանը, հարցին, թե որքան արժանահավատ կարող են լինել Նաիրի Հունանյանի հնարավոր հայտարարությունները ոճրագործությունից 20 տարի անց, պատասխանել է.«Ես չեմ հավատում Նաիրի Հունանյանի որեւէ խոսքին։ Նաիրի Հունանյանը խոստովանելու բոլոր հնարավորությունները ուներ ուղիղ 20 տարի առաջ։ Ոչ մի բան նրան չէր կաշկանդում, որովհետեւ նա հասկանում էր իր արարքի բոլոր իրավական հետեւանքները»։

Դիտարկմանը, թե մշտապես նախկին ընդդիմադիր շրջանակները, որոնք այսօր իշխանության ղեկին են, հայտարարել են, որ օրվա իշխանությունը չի ցանկացել բացահայտել եղելությունը, Խոսրով Հարությունյանը պատասխանել է.«Գիտեք, այդպես կարելի է ասել, բայց ի՞նչն էր նրան կաշկանդում, ինչի՞ց էր նա կաշկանդվում, միեւնույնն է՝ նա գիտեր, որ պետք է ցմահ բանտարկվի։ Ես դա չեմ հասկանում»։

Խոսրով Հարությունյանը չի բացառում քաղաքական նպատակահարմարությունից ելնելով տարբեր մանիպուլյացիաների հնարավորությունը. «Հաշվի առնելով ստեղծված իրավիճակը, հաշվի առնելով Ռոբերտ Քոչարյանի շուրջ ընթացող գործընթացները, կարող են փորձել Նաիրիին օգտագործել, նա էլ հաճույքով տրվում է գայթակղությանը, բայց ես մի բան համոզված կարող եմ պնդել՝ այդ մարդը չի կարող այսօր հողի վրա քայլել, իրավունք չունի, չի կարող այս արեւի տակ քայլել՝ իրավունք չունի։ Նրա տեղը այնտեղ է, որտեղ նա հիմա գտնվում է, նա այնտեղ պետք է գտնվի ցմահ՝ անկախ նրանից, թե նա ինչ խոստովանություններ կարող է անել, ինչի դիմաց»։

Աղբյուր` Փաստինֆո