Փաստ ինֆո

«Որպես 2019թ-ի տնտեսական աճի կանխատեսում դրված էր 4,9 տոսկոս ցուցանիշը, բայց եթե նայենք հունվար-սեպտեմբերի մեր ցուցանիշները, կտեսնենք, որ տնտեսական աճի մեր սպասումը, կանխատեսումը շատ ավելի մեծ է»,- Ազգային ժողովում 2020 թվականի պետական բյուջեի նախագծի քննարկման ժամանակ այսօր ասաց ՀՀ վարչապետ Նիկոլ Փաշինյանը։

Վարչապետը նշեց, որ բյուջեի հիմքում դրվում է ոչ թե լավատեսական, այլ պահպանողական կանխատեսում՝ ապահովելու համար մակրոտնտեսական կայունությունը։
«Կարծում եմ՝ սա ճիշտ մոտեցում է ապահովելու համար կայուն մակրոտնտեսական միջավայրը և ֆինանսների նախարարի հետ բազմիցս ենք քննարկել այս մոտեցումը»,-ասաց Փաշինյանը։

Նա հայտնեց, որ 2019թ-ի առաջին 10 ամիսների տվյալներով կա 7,1 տոկոս տնտեսական ակտիվության ցուցանիշ. «Չնայած գրեթե ակնհայտ է, որ 7 տոկոսին մոտ տնտեսական աճ ենք ունենալու, բայց, եթե ուշադիր լինեք, կտեսնեք, որ ֆինանսների նախարարությունը գնահատում է 6,3 տոկոս տնտեսական աճի հնարավոր ցուցանիշ այս տարի, չնայած կենտրոնական բանկը 7,9 տոկոս է գնահատում»։

Փաշինյանի խոսքով միջազգային կազմակերպությունները վերագնահատել են Հայաստանում տնտեսական աճի վերաբերյալ իրենց գնահատականներն ու դա տեղի է ունեցել բարձրացման միտումով։

«Հիմա միջնաժամկետում Հայաստանի համար ավելի բարձր տնտեսական աճ են կանխատեսում, քան նախկինում էին կանխատեսում։ և, ըստ այդմ, ուզում եմ ընդգծել, որ առաջին 10 ամսվա ցուցանիշներով արդյունաբերական արտադրանքի ծավալի 9,7 տոկոս տնտեսական աճ, շինարարության 4,4 տոկոս, առևտրի շրջանառության 8,8 տոկոս, ծառայությունների 15,5 տոկոս»,-ասաց վարչապետն ու շեշտեց, որ կա նաև միջին ամսական աշխատավարձի աճ՝ 5,9 տոկոսով։

Աղբյուր` Փաստինֆո