Փաստ ինֆո

«Նիկոլ Փաշինյանը անկեղծ է»,-կարծում է նախկին վարչապետ Խոսրով Հարությունյանը՝ խոսելով Պետական բյուջե 2020-ի մասին։
«Վարչապետը անկեղծ է այն առումով , որ նույնիսկ ՀՆԱ-ի այն աճը, որը նրանք նախատեսել են եկող տարվա համար, դա էլ կարող է լինել ռիսկային։ Բոլորիս ակնհայտ է, որպեսզի կարողանան ապահովել տնտեսության առաջանցիկ աճ եւ դինամիկ զարգացում , պետք է ունենալ ներդրումներ։ Այսօր մենք ներդրումներ չունենք»,- «Փաստինֆո»-ի հետ զրույցում ասաց Խոսրով Հարությունյանը։

Նշենք, որ Բյուջե 2020-ը ներկայացնելիս վարչապետ Նիկոլ Փաշինյանը խորհրդարանում հայտարարել է. «Մենք առաջնորդվում եք առավել պահպանողական սցենարով, բյուջեի հիմքում դնում ենք ոչ թե ամենալավատեսական կանխատեսումը, այլ՝ որոշակի պահպանողական կանխատեսում՝ ապահովելու համար մակրոտնտեսական կայունությունը» ։

Վարչապետը նաեւ նշել է. «Մենք առաջնորդվում ենք «надейся на лучшее, готовься к худшему» սկզբունքով։
Ըստ Խոսրով Հարությունյանի, անգամ այն ցուցանիշները, որոնք մենք արձանագրել ենք 2018 թվականի ընթացքում, ըստ էության, նախկինում իրականացված ներդրումների իներցիայի արդյունքն էին։ «Երբ վարչապետը 2019 թվականի բյուջեն ներկայացնում էր որպես «իներցիոն» բյուջե, նա ճիշտ էր, նա նորից անկեղծ էր։ Ըստ էության, որեւէ կառուցվածքային, ինստիտուցիոնալ, այնպիսի բարեփոխումներ, որոնք կերաշխավորեն կամ հույս կներշնչեն, որ ներդրողները կգան Հայաստան, մենք չենք տեսնում։ Ավելին, այն ինչին մենք ականատես ենք՝ դատական իշխանության նկատմամբ անընդհատ ոտնձգություններ, հեղափոխական զարգացումներ, այս ամենը խորթ են ներդրողի համար։ Կապիտալը հոսում է այնտեղ , որտեղ իրավիճակը կայուն է ու կանխատեսելի։ Սա է իրականությունը»։

Խոսրով Հարությունյանը նկատում է՝ ամենատարբեր միջազգային հարթակներում իշխանությունը դեռ խոսում է հեղափոխությունից։ Ըստ նրա, սա, գուցե անկեղծ է , բայց ներդրողներին քիչ է հետաքրքրում։ Ինչ վերաբերում է տնտեսական հեղափոխության մասին նախկինում հնչած հայտարարություններին ու Բյուջե 2020-ի «պահպանողական» բնորոշմանը, Խոսրով Հարությունյանն ասաց.«Այսպես ասած, տնտեսական հեղափոխության հիմքում դրվել էր մի շատ պարզունակ գաղափար՝ եթե քաղաքացին ունակ է քաղաքական հեղափոխություն իրականացնել, ինչո՞ւ չի կարող տնտեսական հեղափոխություն իրականացնել։ Բայց, ո՞րն է տնտեսական հեղափոխությունը։ Դա, թերեւս, պետք է ենթադրի տնտեսության ոլորտում այնպիսի հեղափոխական փոփոխություններ, որոնք մի կողմից կստեղծեն իրավական ու օրենսդրական երաշխիքներ՝ թռիչքաձեւ զարգանալու համար, մյուս կողմից ազգային տնտեսությունը կդարձնեն ավելի մրցունակ։ Ինձ համար տնտեսակաան հեղափոխությունը սա է, որովհետեւ կախարդական փայտիկով թռիչքաձեւ զարգացում հնարավոր չէ իրականացնել»։

Խոսրով Հարությունյանի համոզմամբ, եկող տարվա բյուջեն ոչ թե զարգացման, այլ ընդամենը նախկինում ունեցած ձեռքբերումների պահպանման բյուջե է։

Աղբյուր` Փաստինֆո