Փաստ ինֆո

«Արման Բաբաջանյանը ԶԼՄ-ներով արդեն ներկայացրել է տեսակետ, մենք այս պարագայում ոչ մի խնդրի առաջ չենք կանգնելու։ Երբ Արման Բաբաջանյանն իր տեղեկությունը մեզ կփոխանցի՝ կզբաղվենք դրանով»,-այս մասին այսօր լրագրողների հետ ճեպազրույցում ասաց Ազգային անվտանգության ծառայության տնօրենի պաշտոնակատար Էդուարդ Մարտիրոսյանը՝ անդրադառնալով ԱԺ անկուսակցական պատգամավոր Արման Բաբաջանյանը և հոկտեմբերի 27-ի ահաբեկչության կազմակերպիչ Նաիրի Հունանյանի հանդիպմանը։

Խոսելով քննադատությունների մասին, թե ԱԱԾ-ն քաղաքական հետապնդում է իրականացնում Հրայր Թովմասյանի նկատմամբ, անվտանգության ծառայություն է հրավիրում Թովմասյանի ընտանիքին, գնում նրա տուն՝ ԱԱԾ տնօրենի պաշտոնակատարն ասաց. «Ոչ մի քաղաքական հետապնդման խնդիր չի եղել, ենթատեքստ, խնդրում եմ, չփնտրել։ Ուղղակի նյութերի ամբողջական նախապատրաստման ամբողջականությունն ապահովելու համար խնդիր է առաջացել մեզ մոտ հրավիրել Թովմասյանի երկու դուստրերին ու հորը։ Երեխաներն էլ 23-25 տարեկան են եղել, խնդիրը կապված է եղել գույքի հետ և մենք պարտավոր էինք պարզաբանում իրականացնել այդ հարցով՝ ամբողջականությունն ապահովելու համար»։

Մարտիրոսյանն ասաց, որ ԱԱԾ աշխատակիցները զանգել են Թովմասյանին, սակայն նա հեռախոսազանգերին չի պատասխանել և հետագայում էլ մեկնել է ՌԴ։
Հարցին՝ չներկայանալն ի՞նչ կարող է ենթադրել, ԱԱԾ տնօրենի պաշտոնակատարն ասաց. «Ոչ մի բան, մենք այդտեղ ոչինչ չենք տեսնում։ Ուղղակի որպես բարի կամքի դրսևորում մենք իրեն ուզում էինք տեղեկացնել, որ նման խնդիր կա։ Այստեղ ոչ մի քաղաքական ենթատեքստ չկա»։

Հարցին, պետական վերահսկողական ծառայությունն Արթուր Վանեցյանի շու՞րջ է ստուգումներ իրականացնում, Մարտիրոսյանը պատասխանեց, որ ստուգումները կապ չունեն Վանեցյանի հետ, ուղղակի ՊՎԾ-ն իր գործառույթների շրջանակում ուսումնասիրում է ԱԱԾ-ի ֆինանսական գործունեությունը 2 տարվա կտրվածքով։

Խոսելով ԱԱԾ տնօրենի պաշտոնը զբաղեցնելու հեռանկարի մասին, Մարտիրոսյանն ասաց. «Եկեք նախապես ոչինչ չասեմ։ Քննարկումներ չեն եղել, այս պահին ես տնօրենրի պարտականությունները ժամանակավոր կատարող եմ և ստիպված եմ անել այն ամենն ինչ դրված է ինձ վրա»,-ասաց ԱԱԾ տնօրենի պաշտոնակատարն, ապա ուղղեց ինքն իրեն ու ասաց, որ ոչ թե ստիպված է, այլ ցանկություն ունի անել այդ ամենը։

Նա նաև հայտնեց, որ Արթուր Վանեցյանի ձերբակալման կամ կալանավորման հետ կապված լուրերն իրական չեն։

Հեղինակ` Սոնա Գեւորգյան